រដូវកាលថ្មីនឹងចាប់ផ្ដើមនៅចុងសប្ដាហ៍នេះហើយ ស្របពេលក្រុមបិសាចក្រហម Manchester United នៅមិនទាន់យកបានកីឡាករដែលខ្លួនចង់បានអស់នោះទេ។
ជាក់ស្ដែង ជម្រើសទី១ដែលពួកគេចង់បានគឺ Frankie de Jong របស់ក្រុម FC Barcelona ។ រហូតមកដល់ពេលនេះ សាមីខ្លួននៅតែមិនទាន់ព្រមចាកចេញពី Camp Nou ដដែល ហើយអះអាងថាមិនចង់មកលេងនៅ Man Utd ផងដែរ ព្រោះមិនពេញចិត្តជាមួយគោលដៅរបស់ក្លឹប។ តែទោះជាយ៉ាងនេះក្ដី ភាគីក្រុមបិសាចក្រហមនៅតែចិញ្ចឹមចិត្តចង់បានខ្សែបម្រើហុល្លង់មករួមក្រុមដដែល ព្រោះគេជាមនុស្សម្នាក់ដែលអ្នកចាត់ការ Ten Hag មើលឃើញថាសក្ដិសមជាមួយក្រុមបំផុត។
អ្នកចាត់ការហុល្លង់ខាងលើបានប្រាប់ទៅថ្នាក់ដឹកនាំដេញថ្លៃម្ដងទៀតទៅលើ De Jong នេះ។ ដោយតម្លៃ៦០លានផោន អាចនឹងត្រូវរ៉ូវគ្នាហើយ ព្រោះនាពេលបច្ចុប្បន្ននេះ Barcelona ពេញជើងកីឡាករ និងកីឡាករចំណូលថ្មីមួយចំនួននៅមិនទាន់អាចចុះឈ្មោះចូលក្របខណ្ឌ La Liga បាននោះទេ។ ពួកគេត្រូវលក់កីឡាករក្នុងក្រុមនាពេលបច្ចុប្បន្នច្រើននាក់ទៀត ដើម្បីដាក់កីឡាករថ្មីបាន៕