តារាឆ្នើមក្លឹប Manchester United គឺ Cristiano Ronaldo នៅមិនទាន់សម្រេចអនាគតច្បាស់នៅឡើយ ដ្បិតបើកាលបរិច្ឆេទបិទទ្វារទីផ្សារដោះដូររដូវក្តៅ នៅសល់ត្រឹមរយៈពេល ១ សប្តាហ៍ទៀត។ ឥឡូវយើងទទួលដំណឹងថ្មីថា ភាគីក្លឹបអាណាព្យាបាលព្រមបើកភ្លើងខៀវ ឲ្យ CR7 ផ្លាស់ចេញទៅហើយ តែក្នុងលក្ខខណ្ឌខ្ចីជើង។
នេះក៏ទាមទារឲ្យ Ronaldo ត្រូវព្រមការបន្តកុងត្រាថ្មីបន្ថែម ១ ឆ្នាំទៀត ពីលើសុពលភាពកុងត្រាចាស់ ដែលត្រូវផុតនៅចុងខែមិថុនា ឆ្នាំ ២០២៣។ មានន័យថា ព្រមឲ្យផ្ទេរទៅក្លឹបដទៃ តែនៅបញ្ចប់រដូវកាលបន្ទាប់ ត្រូវវិលត្រលប់មកឈរជើងឲ្យក្លឹបអាណាព្យាបាលវិញជាកំហិត។
បើតាមសារព័ត៌មាន The Mirror ចុះផ្សាយថា United កំពុងសកម្មក្នុងការស្វែងរកក្លឹបថ្មី ដែលអាចឲ្យ Ronaldo ជ្រកកោនបាន ក៏ដូចជាអាចលេងពានអឺរ៉ុប UEFA Champions League ជាគោលដៅអាទិភាពកីឡាករចង់បាន។ នៅសល់តែក្លឹប ៣ ប៉ុណ្ណោះ ដែលស្ថិតក្នុងការចរចា ដំណាក់កាលចុងក្រោយរួមមាន Chelsea, Atletico Madrid និង Sporting Lisbon ស្របពេល PSG និង Bayern Munich គឺមិនសង្ឃឹមឡើយ៕
ប្រភព៖ The Mirror