ប្រធានក្រុម Tottenham កីឡាករ Son Heung-min បានទទូចថា Spurs នឹងមិនចុះចាញ់ក្នុងការបានកៅអីទៅលេងក្របខ័ណ្ឌ Champions League បើទោះបីជាបានរងបរាជ័យ បួនលើកជាប់ៗគ្នាក៏ដោយ។
Son បានព្រមានក្រុមទាំងមូលត្រូវតែនៅជាមួយគ្នា ហើយ “កាន់តែតឹងតែង និងរឹងមាំ” បន្ទាប់ពីការធ្លាក់ទម្រង់លេងដ៏ខ្លាំងនាពេលវេលាចុងក្រោយរបស់ពួកគេបានបន្សល់ទុកនូវឱកាស Top ៤ កាន់តែស្ដួចស្ដើង។ គ្រូបង្វឹកក្រុម Tottenham លោក Ange Postecoglou បានត្រួតពិនិត្យការបរាជ័យចំនួនបួនលើកជាប់ៗគ្នា ដែលជាដំណើរកាដ៏អាក្រក់បំផុតរបស់ក្លឹបក្នុងរយៈពេល ២០ឆ្នាំ ដែលនេះបានផ្ដល់ឱកាសឱ្យក្រុម Aston Villa ឡើងទៅកាន់តំណែងសម្រាប់ចំណាត់ថ្នាក់ទី៤ បានទៅលេងក្របខ័ណ្ឌ Champions League ។ Son បានអះអាងថាការបង្ហាញខ្លួនរបស់ពួកគេជាមួយ Liverpool គឺជាការប្រសើរឡើង បើទោះបីជាចាញ់ ៤-២ គាត់បានសារភាពថាវាមិនងាយស្រួលទេនៅពេលដែលអ្វីៗដំណើរការល្អ ហើយការសាកល្បងពិតប្រាកដគឺនៅពេលដែលមានការបរាជ័យ។ Son ខ្សែប្រយុទ្ធរបស់ Spurs រូបនេះបាននិយាយថា ៖
“គ្រប់គ្នាចង់លេង Champions League ប៉ុន្តែនៅមានការប្រកួតបីទៀតដែលត្រូវប្រឹងប្រែងដើម្បីយកឈ្នះ យើងត្រូវធ្វើអស់លទ្ធភាពនៅអ្វីគ្រប់យ៉ាង។ យើងមិនដឹងថានឹងមានអ្វីកើតឡើងនោះទេ។ ពេលខ្លះបាល់ទាត់អាចជាអភិនិហា។ យើងបន្តជឿជាក់លើប្រកួតរបស់យើង យើងព្យាយាមផ្តោតលើការប្រកួតម្ដងមួយៗក្នុងបីប្រកួតចុងក្រោយរបស់យើង។ មើលចុះ! ក្នុងគ្រាដ៏លំបាកនេះ យើងត្រូវនៅជាមួយគ្នា។ វាជាឱកាសដ៏ល្អសម្រាប់យើងក្នុងការរឹតបន្តឹងសាមគ្គីនិងខ្លាំងជាងមុន។ ការប្រកួតទាំងបួននេះពិតជាស្វិតស្វាញណាស់ ត្រឹមរយៈពេលតែមួយខែ វាមើលទៅពិតជាតែអាក្រក់ណាស់សម្រាប់យើង។ ប៉ុន្តែយើងនឹងប្រយុទ្ធរហូតដល់ទីបញ្ចប់។ នៅក្នុងកីឡាបាល់ទាត់ នៅពេលដែលអ្នកគិតអំពីការចាប់ផ្តើមនៃរដូវកាល ហើយយើងកំពុងលេងបានយ៉ាងល្អ មនុស្សគ្រប់គ្នាពោរពេញដោយភាពរីករាយ ហើយមិនមានសម្ពាធអ្វីឡើយ។ ប៉ុន្តែពេលនេះគឺជាពេលវេលាដែលអ្នករាល់គ្នាត្រូវបោះជំហានឡើងទៅតាមអ្វីដែលយើងចង់ធ្វើ។ ដូចដែលខ្ញុំបាននិយាយពីមុនមក នេះគឺជាពេលវេលា និងឱកាសដើម្បីកាន់តែរឹងមាំ ហើយមកជាមួយគ្នា។ នៅពេលដែលអ្វីៗដំណើរការល្អ វានឹងងាយស្រួលទាំងអស់គ្នា។ ប៉ុន្តែក្នុងពេលដ៏លំបាក អ្នករាល់គ្នាត្រូវរួមគ្នាជួយគ្នាទៅវិញទៅមក”។
Son ក៏បានទទូចថា Tottenham នៅតែដើរលើផ្លូវត្រូវ បើទោះបីជាការបរាជ័យចុងក្រោយរបស់ពួកគេជាមួយ Liverpool ក៏ដោយ ហើយវានឹងត្រូវការពេលវេលាសម្រាប់ Postecoglou ដើម្បីឱ្យវាកាន់តែត្រឹមត្រូវ។ គាត់បានបន្ថែមថា៖
“នៅពេលដែលអ្នកមើលលើលទ្ធផល វាពិតជាខកចិត្តខ្លាំងណាស់ ប៉ុន្តែខ្ញុំគិតថាយើងដើរលើផ្លូវត្រូវ។ កុំភ្លេចថា វាជារដូវកាលដំបូងរបស់អ្នកចាត់ការ ហើយយើងមានកីឡាករថ្មីទើបមកលេងឱ្យយើងនៅ Premier League។ កុំយល់ច្រឡំ វាជាការខកចិត្តខ្លាំងណាស់ក្នុងការចាញ់ ៤ប្រកួតជាប់ៗគ្នា ប៉ុន្តែខ្ញុំគិតថា ពួកយើងត្រូវតែទប់ការឈឺចាប់នេះ និងលទ្ធផល ធ្វើការឱ្យខ្លាំង និងកាន់តែប្រសើរឡើង”។
ប្រភព បរទេស