ក្លឹបមេឃខៀវ Manchester City បានបញ្ចប់ការប្រកួតមិត្តភាព ទល់ Bayern Munich តាមរយៈលទ្ធផលយកឈ្នះ ១-០ ហើយកាន់តែពិសេស វាជាគ្រាប់បាល់សម្រេចបានដោយកីឡាករវ័យក្មេង Erling Haaland។ នេះជាគ្រាប់បាល់ដំបូងបើកគណនីនៅក្លឹបថ្មី ហើយក៏ជាជ័យជម្នះលើកដំបូងរបស់កីឡាករទៅលើក្លឹបយក្សអាល្លឺម៉ង់។
ចាយពេលត្រឹម ១២ នាទីលើទីលាន បុរសសញ្ជាតិន័រវែស អាចរកបានគ្រាប់បាល់ឲ្យ City ហើយរក្សាលទ្ធផលដល់ចប់ការប្រកួត ក្រោមក្រសែភ្នែកអ្នកទស្សនាដល់ទៅជាង ៧៨ ០០០ នាក់ក្នុងកីឡដ្ឋាន។ Haaland បាននិយាយ៖ “វាជាការចាប់ផ្តើមដ៏ល្អ ក្រោយការមិនបានលេងបាល់ទាត់រយៈពេល ៦ សប្តាហ៍ ដូច្នេះនេះជាអារម្មណ៍ពិសេសខ្លាំងណាស់សម្រាប់ខ្ញុំ”។
គេបន្តទៀតថា៖ “វាជាលើកដំបូង ដែលខ្ញុំលេងឈ្នះ Bayern បន្ទាប់ពីការចាញ់ ៧ លើកជាប់ៗគ្នា នេះជាគុណភាពដ៏ល្អពិត ហើយជារសជាតិពិសេសមួយ មុនការប្រកួតទល់ Liverpool នៅពាន Community Shield”។ បញ្ជាក់ថា ក្រោយរដូវរងា ឆ្នាំ ២០២០ នៃការផ្ទេរមក Dortmund ៧ ប្រកួតជាប់ៗគ្នា ដែលលេងទល់ Bayern មិនដែលបានស្មើ ឬឈ្នះឡើយ ពោលសុទ្ធតែជាលទ្ធផលចាញ់៕
ប្រភព៖ Sportsmole