ជាមួយការផ្លាស់ទៅកាន់ទ្រនំថ្មី នៅឯទឹកដីអាល្លឺម៉ង់ គឺក្លឹប Bayern Munich សម្រាប់ខ្សែប្រយុទ្ធសេណេហ្គាល់ Sadio Mane លឺថា អាចទទួលបានប្រាក់ពលកម្មប្រហែល ២០ លានអឺរ៉ូ/ឆ្នាំ ឬកាត់កងទៅប្រហែល ៣៨៥ ០០០ អឺរ៉ូ/សប្តាហ៍។ នេះបើតាមសារព័ត៌មាន Bild បានចុះផ្សាយ។
ទំហំប្រាក់ពលកម្មដ៏ក្រាស់ក្រែល ត្រូវបានគេជឿថា នឹងមិនបានជួយឲ្យ Mane អាចបន្ថែមជីវិតស៊ីវិល័យ ឬសល់ទ្រព្យជាដុំកំភួនដូចកីឡាករដទៃឡើយ ផ្ទុយទៅវិញ បុរសជាតិសាសន៍អាហ្វ្រិកម្នាក់នេះ មានតែបន្ថែមផែនការណ៍ជួយដល់អ្នកខ្វះខាតនៅឯស្រុកកំណើត ពិសេសពង្រីកការអភិវឌ្ឍភូមិកម្សត់ Bambali ជាទីកន្លែងកំណើតរបស់ខ្លួន។
នៅក្នុងអត្ថបទនេះ CTS Sports រំឭកបង្ហាញការផ្តល់ជំនួយធំៗ ៣ លើក ដែលកីឡាករវ័យ ៣០ ឆ្នាំ បានផ្តល់ឲ្យអ្នកស្រុកនៅឯប្រទេសសេណេហ្គាល់ ដល់ជាប់រហស្សនាម “ជាបុរសសម្បុរខ្មៅ បេះដូងមាស”៖
៣) ជួយសាងសង់សាលារៀន
អ្នកភូមិផងរបស់ Mane គឺសុទ្ធសឹងស្ថិតក្នុងជីវភាពខ្វះខាត រកព្រឹកខ្វះល្ងាច ហើយតំបន់នោះ ដើមឡើយគឺដាច់ស្រយាល រកតែកន្លែងសាបព្រោះចំណេះដឹងដល់ក្មេងៗក៏គ្មានផង។ តែមកទល់ប៉ុន្មានឆ្នាំចុងក្រោយ Bambali បានប្រែក្លាយជាភូមិអភិវឌ្ឍមួយ ហើយវាកើតចេញពីទឹកចិត្តនៃការចំណាយរាប់សិបលានដុល្លារ របស់កីឡាករមិនភ្លេចកំណើតខាងលើ។
Mane បានចាយលុយជិត ២៥០ ០០០ ដុល្លារ សាងសង់សាលារៀន ហើយសិស្សានុសិស្សនៅទីនោះ អាចទទួលបានការក្រេបយកចំណេះដឹង ដោយឥតគិតថ្លៃ ហើយថែមទាំងទទួលការផ្គត់ផ្គង់ទាំងសម្ភារៈសិក្សា មានកុំព្យូទ័រ សំលៀកបំពាក់ ពោលគឺកីឡាកររបស់ក្លឹប Bayern Munich ទទួលរ៉ាប់រងទាំងស្រុង ឲ្យតែក្មេងៗអាចសិក្សារៀនសូត្រ ព្រោះអតីតកាលគេធ្លាប់បញ្ជាក់ ថាគេគ្មានលទ្ធភាពបានទទួលការសិក្សានោះឡើយ ហើយបើគ្មានបាល់ទាត់ ជីវិតគឺស្មើ ០ ដូច្នេះគេនឹងយកលុយដែលទទួលបានពីបាល់ទាត់ មកសាយភាយចែករំលែកចំណេះដឹង ដល់ក្មេងៗជំនាន់ក្រោយ។
២) ជួយសាងសង់មន្ទីរពេទ្យ
វាជាលើកទី ១ ដែលតំបន់ដាច់ស្រយាលនោះ មានមន្ទីរពេទ្យទទួលព្យាបាលត្រឹមត្រូវ ហើយសមិទ្ធផលនេះ ក៏កើតចេញពីទឹកចិត្តរបស់ Mane ដូចគ្នា ដោយចាយលុយអស់ជាងកន្លះលានដុល្លារអាមេរិក គិតតែលើការសាងសង់។
មន្ទីរពេទ្យនោះ ទទួលផ្តល់សេវាកម្មឥតគិតថ្លៃ និងជួយដល់អ្នកខ្វះខាតនៅទូទាំងតំបន់ ច្រើនជាង ៣០ ភូមិ។ អគារដែលបានបញ្ចប់ការសាងសង់កាលពីប៉ុន្មានឆ្នាំមុន ក៏នៅតែទទួលបានការអភិវឌ្ឍជាបន្តបន្ទាប់ ហើយសព្វថ្ងៃមានបន្ទប់ពិគ្រោះយោបល់ សេវាថែទាំសម្ភព និងបរិក្ខារទន្តសាស្ត្រ។
កាលពីឆ្នាំ ២០២០ Mane បាននិយាយប្រាប់សារព័ត៌មាន The Guardian៖ “ខ្ញុំចាំបាន កាលប្អូនស្រីរបស់ខ្ញុំកើត គឺកើតនៅផ្ទះ ព្រោះភូមិយើងអត់មានពេទ្យទេ ដូច្នេះខ្ញុំយល់ អំពីស្ថានភាពដ៏លំបាកនេះ លើអ្នកភូមិរាល់គ្នា អ៊ីចឹងទើបខ្ញុំសម្រេចសាងសង់មន្ទីរពេទ្យមួយខ្នងឡើង ដើម្បីផ្តល់ក្តីសង្ឃឹមដល់ការរស់នៅ”។
៣) ជួយមួយគ្រួសារ ជិត ៣០ មុឺនរៀល/ខែ
ក្រៅតែពីផ្តល់សេវាកម្មឥតគិតថ្លៃជាច្រើន ទៀតសោត Mane ក៏ជំនួយដល់គ្រួសារដែលមានការខ្វះខាតខ្លាំង នូវប្រាក់ឧបត្ថម្ភមួយខែប្រហែល ៧៥ ដុល្លារ ឬ ៣០ មុឺនរៀលផងដែរ។ លើសពីនេះ ក៏បានសហការជាមួយក្រុមហ៊ុនធំៗ ដូចជា Orange ឲ្យជួយផ្គត់ផ្គង់សេវាអ៊ីនធឺណិតល្បឿនលឿន 4G ដល់ប្រជាជនក្នុងតំបន់ ហើយថ្មីៗ ក៏ទើបតែសម្ពោធដាក់ឲ្យប្រើប្រាស់នូវស្ថានីយប្រេងឥន្ធនៈមួយកន្លែងផ្សេងទៀត។ ទាំងនេះ គ្រាន់ជាទឹកចិត្តមួយផ្នែកដែល CTS Sports លើកមកបង្ហាញតែប៉ុណ្ណោះ ដោយការពិតទៅ គឺមានច្រើន ល្មមអាចរាប់បាន ថា Mane ជាកីឡាករបាល់ទាត់ ដែលមានទឹកចិត្តល្អបំផុតក្នុងលោក៕
ប្រភព៖ បរទេស