ស្ថិតក្នុងលក្ខខណ្ឌខ្ចីជើង Philippe Coutinho មិនទាន់សម្រេចនៅឡើយ ថានឹងបន្តនៅ ជាមួយលក្ខខណ្ឌផ្តាច់កុងត្រារវាងភាគីក្លឹប Barcelona ហើយមកចាប់អាជីពថ្មីនៅ Aston Villa ក្រោយបញ្ចប់រដូវកាលខាងមុខ ឬក៏សម្រេចបែបណា។ តែឥឡូវយើងទទួលបានដំណឹងថ្មី ថាកីឡាករប្រេស៊ីល ក៏ស្រាប់ទទួលបានការចាប់អារម្មណ៍ពីសំណាក់ក្លឹបរួមលីគមួយទៀត គឺ Newcastle United។
បុរសវ័យ ២៩ ឆ្នាំ ស្ថិតក្រោមសុពលភាពកុងត្រានៅក្លឹបអាណាព្យាបាល Barcelona ដល់ចុងខែមិថុនា ឆ្នាំ ២០២៣។ យ៉ាងណាក្លឹប Aston Villa មានសិទ្ធអាចទិញផ្តាច់ នៅតម្លៃកំណត់មួយ តែមិនច្បាស់ថាការចរចាបានដំណើរការដល់ណាហើយទេ។ ឆ្លៀតឱកាសល្អនេះ Newcastle ក៏ប្រជ្រៀតខ្លួនចូលបៀត ព្រោះចាប់អារម្មណ៍លើសមត្ថភាពអតីតខ្សែបម្រើហង្សក្រហមជាខ្លាំង។ នេះបើតាមសារព័ត៌មាន Goal បានចុះផ្សាយ។
រំឭក ឲ្យដឹងកន្លងទៅ លោក Steven Gerrard ជាអ្នកចាត់ការក្លឹបម្ចាស់ដី Villa Park ក៏ប្រកាសជាសាធារណៈ ថាចង់បានវត្តមាន Coutinho បន្តឈរជើងនៅរដូវកាលក្រោយតទៅទៀត។ ស្ថិតិរបស់គេជាមួយក្លឹបអង់គ្លេស រដូវកាលនេះ បង្ហាញខ្លួន ១៦ ប្រកួត រកបាន ៤ គ្រាប់និង Assist ៣ លើក។ តាមដឹងតម្លៃផ្តាច់កុងត្រា អាចថ្លៃល្បាក់ ៤០ លានអឺរ៉ូ ប្រសិនភាគីក្លឹបណាមួយចង់បានគេទៅចូលរួម៕
ប្រភព៖ Goal