ក្លឹប Real Madrid បានឡើងទៅវគ្គផ្តាច់ព្រ័ត្រ កំណត់ត្រូវប៉ះសត្រូវចាស់ Liverpool នាវេលាម៉ោង ០២:០០ នាទីទាបភ្លឺ ឈានចូលថ្ងៃទី ២៨ ឧសភា មានផ្សាយផ្ទាល់លើទំព័រ CTS Sports។ បន្ទាប់ពីជ័យជម្នះលើ Man City ងាកទៅវីរបុរសលោក Pele ក៏បានសរសើរមិនដាច់ពីមាត់ដល់គ្រាប់ពេជ្រ Rodrygo Goes ដែលជាអ្នករកបានពីរគ្រាប់ចុងម៉ោង ទើបជួយឲ្យ ក្លឹបអាចបន្ថែមម៉ោង ឈានដល់ការយកឈ្នះលើក្លឹបអង់គ្លេស។
អតីតជើងចាស់ Pele និយាយ៖ “ខ្ញុំតែងតែដឹងថានឹងមានថ្ងៃត្រូវអបអរចូលសម្រាប់ឯងមកដល់ Rodrygo ដោយគ្មានអ្វីធំជាង ការដែលកីឡាករម្នាក់ខិតខំខ្លាំង និងស្រលាញ់នូវអ្វីដែលពួកគេកំពុងធ្វើទេ ចូលរួមអបអរដល់ Real Madrid ខ្ញុំពិតមិនអាចទន្ទឹងរង់ចាំនឹងការមកដល់នូវវគ្គផ្តាច់ព្រ័ត្រនោះទេ”។
គួរបញ្ជាក់ថា Pele គឺជាអ្នកគាំទ្រដ៏ធំម្នាក់របស់យុវជន Rodrygo ចាប់តាំងពីគ្រាគេនៅលេងឲ្យក្លឹប Santos មកម្ល៉េះ ដោយលោកមើលឃើញថា កីឡាករប្រេស៊ីលវ័យក្មេងរូបនេះ ប្រាកដជាមានអនាគត ហើយឥឡូវជោគជ័យរបស់គេ បានឆ្លើយតបមកវិញជាបណ្តើរៗហើយ។ ស្ថិតិរដូវកាល ២០២១/២២ សម្រាប់កីឡាករវ័យ ២១ ឆ្នាំ រកបាន ៨ គ្រាប់និង Assist ៩ លើក នៅការបង្ហាញខ្លួន ៤៤ ប្រកួត៕
ប្រភព៖ Marca