ក្រោយដឹកនាំអស់រយៈពេល ១០ ឆ្នាំ លោក Sean Dyche ក៏ត្រូវបានក្លឹបប្រកាសដកតំណែងកាលពីពេលថ្មីៗនេះ ហើយឥឡូវស្រាប់ទទួលបានដំណឹងថា មានក្លឹបនៅអង់គ្លេសទាក់ទងមកហើយ តែស្ថិតនៅក្របខ័ណ្ឌលំដាប់ពីរ មិនមែនជាក្របខ័ណ្ឌកំពូល Premier League។
បើតាមសារព័ត៌មាន Birmingham Live ចុះផ្សាយ ក្លឹប West Bromwich Albion កំពុងទាក់ទងទៅលោក Dyche ឲ្យមកចាត់ការជំនួស ក្រោយមិនពេញចិត្តនឹងការដឹកនាំរបស់លោក Steve Bruce នៅពេលបច្ចុប្បន្ន។ ក្រោយការចាកចេញរបស់គ្រូចាស់ Valerien Isamel នៅខែកុម្ភៈ ក្លឹបបានចាត់តាំង Bruce ឲ្យដឹកនាំបន្ត ក៏ប៉ុន្តែមិនទទួលបានជោគជ័យជាដុំកំភួនឡើយ ហើយឃើញបរាជ័យច្រើនជាងជ័យជម្នះ។
ពេលនេះ West Bromwich កំពុងឈរលេខ ១១ នៅតារាង Championship ខណៈការប្រកួតសេសសល់តែ ៤ ជុំទៀត រួចនៅដាច់គម្លាត ៥ ពិន្ទុ ធៀបនឹងក្រុម Top 6។ ក្លឹបកំពុងពិចារណាចង់យក Dyche មានបទពិសោធន៍ជោកជាំឲ្យមកដឹកនាំនៅពេលដ៏ខ្លីខាងមុខ ដែលនេះយើងនៅរង់ចាំតែចម្លើយពីសាមីខ្លួនតែប៉ុណ្ណោះ។ រំឭកថា បុរសវ័យ ៥០ ឆ្នាំ បានដឹកនាំ Burnley ចន្លោះឆ្នាំ ២០១២ ដល់ ២០២២ ហើយបានជួយ Burnley មិនឲ្យធ្លាក់ចេញពី PL នៅ ៦ រដូវកាលចុងក្រោយ៕
ប្រភព៖ Birmingham Live