Darwin Nunez ត្រូវបានគេប្រទះឃើញនៅទីក្រុង Barcelona ជាមួយខ្សែការពារ Araujo តែប៉ុន្មានថ្ងៃបន្ទាប់ពីលេចចេញជាគោលដៅផ្ទេររបស់ក្លឹបកាតាឡាន់។ SunSport បានបង្ហើបថា ខ្សែប្រយុទ្ធរូបនេះគឺជាបេក្ខភាពដ៏ភ្ញាក់ផ្អើលមួយក្នុងការចូលរួមជាមួយក្លឹបយក្សអេស្ប៉ាញនៅរដូវក្តៅនេះ។ប៉ុន្មានថ្ងៃមុនគាត់ក៏បានលុបរូបភាពទាំងអស់ដែលគាត់បានលេងឱ្យ Liverpool ចេញពីទំព័រ Instagram របស់គាត់។ ឥឡូវនេះ Nunez បានបង្ហាញខ្លួនដើម្បីជំរុញការរំពឹងទុកបន្ទាប់ពីបានភ្ជាប់ទំនាក់ទំនងជាមួយមិត្តរួមក្រុមជម្រើសជាតិរបស់គេ។ កីឡាករវ័យ ២៤ឆ្នាំរូបនេះកំពុងនៅ Barcelona ជាមួយមិត្តរួមជាតិអ៊ុយរូហ្គាយ Ronald Araujo ដែលលេងឱ្យ Barca។ Araujo បានចែករំលែកនៅរូប Selfie របស់ខ្លួននិង Nunez ទៅកាន់ Instagram រួមជាមួយពាក្យថា “Mi Hermano” ដែលមានន័យថា “My Brother”។ អ្នកទាំងពីរធ្លាប់លេងជាមួយគ្នា១៧ដងឱ្យអ៊ុយរូហ្គាយទាំងកម្រិតយុវជននិងឈុតធំ។ វាស្របពេលដែល Barcelona កំពុងសម្លឹងមើលការផ្លាស់ប្តូរដ៏មានសក្តានុពលសម្រាប់ខ្សែប្រយុទ្ធក្នុងរដូវក្តៅខាងមុខ។ Nunez ត្រូវបានគេកំណត់ថាជាអ្នកជំនួស Robert Lewandowski ប្រសិនបើគាត់ចាកចេញពីក្លឹប។ Barca ក៏ជឿថា Liverpool នឹងមានឆន្ទៈក្នុងការលក់ Nunez ដើម្បីបង្កើនប្រាក់សម្រាប់រៀបចំក្រុមឡើងវិញរបស់លោក Arne Slot ដែលជាអ្នកចាត់ការថ្មី។
គួររំលឹកផងដែរថា Nunez នៅសល់កុងត្រារយៈពេល ៤ឆ្នាំទៀតនៅ Anfield ដោយបានចុះហត្ថលេខាពី Benfica ក្នុងឆ្នាំ ២០២២។ ទោះបីជាមានការរិះគន់ពីអ្នកគាំទ្រគូប្រជែងក៏ដោយ គាត់បានស៊ុតបញ្ចូលទីបាន ១៨គ្រាប់ និងបញ្ជូនបាល់ឱ្យមិត្តរួមក្រុមចំនួន ១៣ដង នៅគ្រប់ការប្រកួតទាំងអស់ក្នុងរដូវកាលនេះ។ មានតែ Mohamed Salah ប៉ុណ្ណោះដែលស៊ុតបញ្ចូលទីបានច្រើនជាង Nunez សម្រាប់ក្រុម Liverpool រហូតមកដល់ពេលនេះ។
ប្រភព The Sun