នៅការប្រកួតជុំទី ៣០ របស់ក្លឹប Man Utd បានបញ្ចប់ទៅក្រោមលទ្ធផលស្មើ ១-១ ទល់ក្លឹបភ្ញៀវ Leicester City ហើយនៅប្រកួតនេះ ក៏កើតមានរឿងរ៉ាវចម្រូងចម្រាសជាច្រើន ដែលកំពុងនាំឲ្យមតិពីអ្នកគាំទ្រ មានការសង្ស័យថា បិសាចក្រហម ថាមិនត្រូវអាចនឹងរបូតទាំងកៅអី Champions Legaue និងសូម្បីតែ Europa League។
គ្រប់គ្នាកំពុងមិនយល់ អំពីយុទ្ធសាស្រ្តដឹកនាំរបស់លោក Ralf Rangnick ជុំវិញការរៀបចំប្រព័ន្ធលេង ដែលត្រូវបន្តធ្វើមិនបានល្អម្តងហើយម្តងទៀត។ កាលពីយប់មិញ Man Utd មិនមានវត្តមាន Cristiano Ronaldo ឬសូម្បីតែ Edinson Cavani ដូច្នេះមានន័យថា ប្រយុទ្ធកណ្តាល គឺគ្មានជម្រើសក្នុងដៃតែម្តង ប៉ុន្តែគ្រូជាប់រហស្សនាម “បិតាបាល់ទាត់អាល្លឺម៉ង់” ក៏នៅសល់ប្រយុទ្ធស្លាបមួយចំនួន ដែលទំនេរ តែបែរដាក់ខ្សែបម្រើ ឲ្យមកដើរតួជាខ្សែប្រយុទ្ធទៅវិញ។
ពាក់ព័ន្ធនឹងរឿងរ៉ាវនេះ លោក Gary Neville ជាអតីតខ្សែការពារនៅក្លឹបម្ចាស់ដី Old Trafford ក៏មានការងឿងឆ្ងល់ និងហួសចិត្តផងដែរ ថាហេតុអ្វីបានជាមិនដាក់ Marcus Rashford ឲ្យចូលលេងនៅតំណែងប្រយុទ្ធ សម្រាប់ជម្រើស ១១ នាក់ដំបូង ទាំងដែលគេបានត្រៀមលក្ខណៈរួចរាល់ហើយនោះ។
ប្រាប់ប៉ុស្តិ៍ Sky Sports លោក Neville ថា៖ “ដើមឡើយមុនការប្រកួត ពេលដឹងក្រុមយើងអត់ខ្សែប្រយុទ្ធកណ្តាល ខ្ញុំរាងស្រងាកចិត្តបន្តិចដែរ តែនេះបែរជាអត់ដាក់ទាំង Rashford ឲ្យចូលលេងថែមទៀត នេះគ្រូដូចបានសម្លាប់គេទាំងរស់ ដោយខ្ញុំយល់ថា គេធ្លាក់ទម្រង់លេង គេខ្វះទំនុកចិត្ត ក៏ប៉ុន្តែនៅស្ថានភាពនេះ ដែល Cristiano អវត្តមាន យ៉ាងណាក៏គួរតែដាក់ Rashford ឲ្យលេងនៅតំណែងប្រយុទ្ធចំតួដែរ ខណៈដែលគេបានឆ្លងកាត់ពេលវេលាហ្វឹកហាត់គ្រប់គ្រាន់ហើយនោះ”។
បញ្ជាក់ថា ប្រព័ន្ធ ៤-២-៣-១ កាលពីយប់មិញនេះ គឺ Rangnick ប្រើដូចគ្នាបេះដាក់ នឹងប្រព័ន្ធលេងកាលប៉ះ Man City ដែលក្រុមបរាជ័យ ៤-១ ហើយឥឡូវមកបន្តប្រើដដែល រួចចុងក្រោយក៏នៅតែខកខានការយកបាន ៣ ពិន្ទុ។ ទៅមើលតារាង Premier League បន្តិច Man Utd ឈរនៅចំណាត់ថ្នាក់ទី ៦ មាន ៥១ ពិន្ទុស្មើ Tottenham រីឯ Leicester ដែលទើបឈានដល់ជុំទី ២៨ មាន ៣៧ ពិន្ទុឈរនៅចំណាត់ថ្នាក់ទី ៩។
ដោយឡែកអំពីមូលហេតុដែល Cristiano Ronaldo អវត្តមាននៅប្រកួតទល់ Leicester City បើតាមការបញ្ជាក់ គឺដោយសារគេមានបញ្ហាសុខភាព កើតជំងឺគ្រុនផ្ដាសាយ។ អាការៈរបស់កីឡាករព័រទុយហ្គាល់មិនទាន់ធូរសះស្បើយនៅឡើយ ស្របពេលដែលសល់ចន្លោះពេល ៦ ថ្ងៃទៀត មុនឈានដល់ការប្រកួតជុំទី ៣១ កំណត់ត្រូវប៉ះ Everton នៅទឹកដី Goodison Park ក៏មានផ្សាយផ្ទាល់លើទំព័រ CTS Sports។
រំឭកថា លើកចុងក្រោយដែល United ខកខានទទួលបានកៅអីនៅ Champions League គឺនារដូវកាល ២០១៤/១៥ ក្រោមការដឹកនាំរបស់លោក David Moyes ដែលបញ្ចប់រដូវកាលចាស់ ឈរលេខរៀងទី ៧។ តែនៅរដូវកាលបន្ទាប់ ក្រោយផ្លាស់លោក Louis van Gaal ឲ្យមកដឹកនាំជំនួស ក្លឹបក៏ទទួលបានឱកាសជាថ្មី អ៊ីចឹងចាំមើលសារនេះ តើ United នឹងត្រូវវិលទៅជាន់ដានចាស់ឬបែបណា?
ប្រភព៖ បរទេស