អតីតវីរបុរសក្លឹប Man Utd លោក Paul Scholes បានបង្ហាញការសោកស្តាយ និងរិះគន់ដល់ការដឹកនាំរបស់លោក Ralf Rangnick ថាជាដើមចម នាំឲ្យក្រុមធ្លាក់ចេញពីពានអឺរ៉ុប ត្រឹមវគ្គ ១៦ ក្រុម រួចបើដាក់ Diego Simeone ឲ្យដឹកនាំវិញ ម្ល៉េះក្រុមនឹងត្រូវឡើងហើយ។
Scholes ហាក់ចង់ឲ្យក្លឹប Man Utd គួរតែនាំយកអ្នកផ្សេងឲ្យមកដឹកនាំ ពោលជាគ្រូមានបទពិសោធន៍កាន់ឆ្នាំ មិនមែនត្រឹមគ្រូបណ្តោះអាសន្ន ដែលមិនច្បាស់លាស់បែបនេះទេ។ ប្រាប់ទៅ BT Sport បុរសសញ្ជាតិអង់គ្លេសថា៖ “រឿងដំបូងដែលក្លឹបត្រូវធ្វើ គឺត្រូវតែរកគ្រូដែលត្រឹមត្រូវ មានបទពិសោធន៍ ២ ទៅ ៣ ឆ្នាំ អាចកសាងប្រព័ន្ធកីឡាករពោរពេញដោយការប្រកួតប្រជែងមួយសិន”។
លោកបន្ត៖ “Atletico ពួកគេមិនមែនជាក្រុមល្អណាស់ណាជាង Man Utd ទេ តែត្រង់ពួកគេជាក្លឹបដែលមានអ្នកចាត់ការពោរពេញដោយបទពិសោធន៍ ដូច្នេះបើ Simeone មកដឹកនាំ Man Utd ប្រកួតនេះ ម្ល៉េះក្រុមយើងនឹងបានឡើងទៅកាន់វគ្គបន្តបាត់ទៅហើយ”។ គួរបញ្ជាក់ថា Scholes ក៏បានណែនាំចំៗដែរថា United គួរតែសម្លឹងការចុះហត្ថលេខាយក Thomas Tuchel ឬ Antonio Conte នៅរដូវក្តៅខាងមុខ៕
ប្រភព៖ Sportskeeda