ក្លឹបអ្នកមានបុណ្យ Barcelona ត្រូវបានគេរាយការណ៍ថា ហាក់មានទំនុកចិត្តខ្ពស់នៅពេលចុងក្រោយ ជុំវិញការនាំយកខ្សែការពារចំណូលថ្មីចេញពីក្លឹបហូឡង់ Ajax។ បើទោះបីជាជាប់ជំពាក់នូវកញ្ចប់លុយជាច្រើន តែក្លឹបមិនបោះបង់នោះទេ លើការនាំយកកីឡាករថ្មី ដោយរិះរកតាមគ្រប់វិធី ជាក់ស្តែងដូចករណីកីឡាករម៉ារ៉ុកសារនេះ គឺលក្ខខណ្ឌផ្ទេរឥតតម្លៃខ្លួន។
នោះគឺយុវជនវ័យ ២៤ ឆ្នាំ Noussair Mazraoui ដែលគេនឹងត្រូវផុតកុងត្រា នាចុងខែមិថុនា ឆ្នាំ ២០២២ ខាងមុខ។ គេលេងតំណែងការពារស្លាបក៏បាន ឬបម្រើការពារក៏បាន ហើយបើមក Barca នោះនឹងអាចសហការជាមួយមិត្តចាស់ Frenkie de Jong ជាកីឡាករធ្លាប់រួមអាជីពនឹងគ្នា ប៉ុន្មានឆ្នាំមុន។
បើតាមអ្នករាយការណ៍ Fabrizio Romano ចុះផ្សាយថា អ្នកមានបុណ្យហាក់មានសង្ឃឹមខ្ពស់សារនេះ ថានឹងថ្ពក់យកបានកីឡាករម៉ារ៉ុកមកកាន់ទឹកដី Camp Nou។ ភ្នាក់ងាររបស់កីឡាករ លោក Mino Raiola ក៏កំពុងសកម្មខ្លាំង ជាមួយភាគីក្លឹប Barcelona ជុំវិញការទាមទារថ្លៃពលកម្ម ៥ លានអឺរ៉ូ/រដូវកាល ក៏ដូចជាប្រាក់ឧបត្ថម្ភផ្សេងទៀត។ រដូវកាលនេះ Mazraoui បង្ហាញខ្លួនឲ្យ Ajax បាន ២៩ ប្រកួទ រកបាន ៥ គ្រាប់និង Assist ដល់ទៅ ៤ លើក៕
ប្រភព៖ Twitter