ខ្សែការពារនៃក្លឹប Barcelona កីឡាករ Ronald Araujo ត្រូវបានគេរាយការណ៍ថា កំពុងសម្រុករៀនភាសាអង់គ្លេសហើយ ពោលចង់ឲ្យស្ទាត់នូវការសន្ទនា ត្រៀមសម្រាប់ការផ្ទេរទៅកាន់ក្លឹបណាមួយនៅក្របខ័ណ្ឌ Premier League នាពេលដ៏ខ្លីខាងមុខ។
កីឡាករវ័យ ២២ ឆ្នាំ បានបដិសេធសំណើបន្តកុងត្រាថ្មីឲ្យក្លឹបម្ចាស់ដី Camp Nou ខណៈដែលសុពលភាពកុងត្រាបច្ចុប្បន្ន សេសសល់តែជាង ១៦ ខែទៀតប៉ុណ្ណោះ។ ដ្បិតលោក Xavi Hernandez ពេញចិត្តសមត្ថភាពរបស់គេ និងចង់ឲ្យគេបន្តនៅ តែសាមីខ្លួនកីឡាករផ្ទាល់ ហាក់ចង់ចាកចេញច្រើនជាង។
បើតាមសារព័ត៌មាន Sport ចុះផ្សាយ Araujo កំពុងសម្រុករៀនសូត្រភាសាអង់គ្លេស ហើយគោលដៅក្លឹបបន្ទាប់ នឹងផ្ទេរទៅ អាចជារវាង Liverpool, Chelsea ឬក៏ Manchester United។ ចាប់តាំងការផ្ទេរមកចូលរួមនៅឆ្នាំ ២០១៨ Araujo ធ្លាប់បានជួយក្លឹបលើកពានរង្វាន់ Copa del Rey ខណៈរដូវកាលនេះ ៣០ ប្រកួត ក៏រកបាន ៣ គ្រាប់ផងដែរ៕
ប្រភព៖ Sport