ជំនួប Manchester Derby កាលពីយប់ថ្ងៃអាទិត្យ ដែលមានផ្សាយបន្តផ្ទាល់លើទំព័រ CTS Sports បានបញ្ចប់ទៅក្រោមលទ្ធផលដែលម្ចាស់ផ្ទះ City យកឈ្នះទៅលើក្រុមភ្ញៀវ United ៤-១។ គ្រាប់បាល់ខាងក្រុមដឹកនាំដោយលោក Pep Guardiola ធ្វើបានដោយ Kevin de Bruyne និង Riyad Mahrez ចែកគ្នាម្នាក់ ២ គ្រាប់ ស្របពេលដែលក្រុមលោក Ralf Rangnick ធ្វើបានដោយ Jadon Sancho។
ក្រោយចប់ការប្រកួត មតិពីអ្នកវិភាគបាល់ទាត់ បានចំ.អកនិងរិះ.គន់ទៅលើប្រព័ន្ធលេងរបស់ Man Utd ដល់ថ្នាក់អ្នកខ្លះជឿថា កីឡាករមួយចំនួន គួរតែដើរចេញពីអាជីពរបស់ពួកគេទៅ ក្រោយធ្វើមិនបានល្អ និងគ្មានឆន្ទៈក្នុងការលេង ទាល់តែសោះ នៅប្រកួតជុំទី ២៨។
ងាកមកលោក Roy Keane ជាអតីតប្រធានក្រុមបិសាចក្រហម បានលើកឡើងប្រាប់ប៉ុស្តិ៍ Sky Sports បែបនេះ៖ “Man Utd ពួកគេហាក់បោះបង់ការប្រកួត ដោយរបៀបដែលពួកគេចាញ់នៅថ្ងៃនេះ គឺលែងរត់ លែងទៅដណ្តើមយកបាល់ នេះខ្ញុំអត់យល់ទាល់តែសោះ ដ្បិតម្នាក់ៗរិះ.គន់ដល់តាក់តិចដែលអ្នកចាត់ការរៀប តែក៏គួរមើលកីឡាករដែរ ពួកគេលេងអត់រត់ផងហ្នឹង នេះពិតជាអា.ម៉ាស់ និងមិនអាចទទួលយកបានឡើយ”។
លោកបន្តថា៖ “អ្នករាល់គ្នាគួរតែលេងដោយមានមោទនភាព នាមជាកីឡាករ Man Utd បន្តិចបានទេ ដោយខ្ញុំអាចកត់សម្គាល់ឃើញ ៥ ឬ ៦ រូប ពួកគេមិនគួរគ្រងឈុតនៃក្លឹបមួយនេះតទៅទៀតទេ ដោយកីឡាករខ្លះបានប្តូរចូល យើងរំពឹងថាអាចជះឥទ្ធិពលល្អដល់ការប្រកួត ផ្ទុយទៅវិញបែរជាអត់ យើងមើលទៅ Wan-Bissaka, Fred, Maguire, Rashford មើលការលេងរបស់ពួកគេចុះ ដូចក្មេងលេងទល់មនុស្សធំអ៊ីចឹង”។
ដោយឡែកងាកទៅ Gary Neville ឯណោះ ក៏បានរិះ.គន់ស្រដៀងនឹង Keane ផងដែរ ដោយថា ការដាក់ Rashford ឲ្យចូលលេងនៅតង់ទី ២ គឺដូចនាំឲ្យទម្រង់លេងរបស់ក្លឹបកាន់តែមានការធ្លាក់ចុះ។ ជាការពិតនៅនាទី ៦៤ លោក Rangnick បានសម្រេចដក Anthony Elanga និង Paul Pogba ហើយជំនួសចូលដោយ Jesse Lingard និង Marcus Rashford។
Neville និយាយ៖ “ខ្ញុំគិតថា ពេល Pogba និង Fernandes គេលេងរួមគ្នានៅខាងមុខ គឺល្អជាងពេល Rashford ចូលមក ដោយពេលដាក់គេចូលមក គឺកាន់តែដុន.ដាបលើសដើម នេះខ្ញុំឆ្ងល់គេខ្លាំងណាស់ មិនមាននរណាដណ្តើមឱកាសពីគេទេ កីឡាករឯទៀតគេបានចាកចេញទៅ តែគេបែរជានៅតែធ្វើមិនបានល្អដដែល”។
គួរបញ្ជាក់ថា ស្ថិតិរបស់កីឡាករអង់គ្លេសរដូវកាលនេះ រកបានតែ ៥ គ្រាប់និង Assist ២ លើកប៉ុណ្ណោះ បើទោះបីមានឱកាសបង្ហាញខ្លួនដល់ ២៤ ប្រកួត។ ឈ្មោះជាខ្សែប្រយុទ្ធមួយរូបដែរ តែស្ថិតិបែរចាញ់ទាំងខ្សែបម្រើ Fernandes អាចរកបានដល់ ៩ គ្រាប់និង Assist ១៤ លើកឯណោះ។
បន្តពីបរាជ័យក្រោមថ្វីជើងរបស់ City ប្រកួតបន្ទាប់ United ក៏នឹងទទួលភារកិច្ចធំផងដែរ នោះគឺការប៉ះ Tottenham Hotspur នាចុងសប្តាហ៍បន្ទាប់ មុនត្រលប់ទៅកាត់សេចក្តីរកក្រុមចាញ់ឈ្នះ រវាង Atletico Madrid នៅឯពានរង្វាន់ UEFA Champions League នៅវេលាទាបភ្លឺ ថ្ងៃទី ១៦ មិនា៕
ប្រភព៖ Sky Sports