ក្លឹបតោខៀវ Chelsea មិនមានបំណងរក្សាជើង Kepa Arrizabalaga ឲ្យហួសពីចុងខែមិថុនា ឆ្នាំ ២០២២ នោះទេ ពោលនឹងត្រៀមលក់ចេញទៅវិញនាពេលខាងមុខ ប្រសិនជាត្រូវរ៉ូវតម្លៃចរចា។ បញ្ជាក់បន្តិច កីឡាករអេស្ប៉ាញ បានក្លាយជាអ្នកចាំទីមានតម្លៃផ្ទេរខ្ពស់បំផុត ក្រោយការផ្ទេរនៅឆ្នាំ ២០១៨ ជាមួយតម្លៃ ៧២ លានផោន។
យ៉ាងណាអតីតកីឡាករក្លឹប Athletic នាពេលចុងក្រោយ មិនបានជាប់ជម្រើសដំបូងតទៅទៀតឡើយ ពោលធ្លាក់មកជាអ្នកចាំទីដៃទី ២ ក្រោយ Edouard Mendy មកដល់។ អនាគតរបស់បុរសវ័យ ២៧ ឆ្នាំ ត្រូវបានគេមើលឃើញថានឹងមិនប្រាកដប្រជាតទៅទៀតទេ ហើយមានភាគរយទំនងត្រូវចែកផ្លូវ នៅក្រោយបញ្ចប់រដូវកាល ២០២១/២២។
តាមសារព័ត៌មាន Daily Star ចុះផ្សាយថា ក្លឹបសារិកាព្រៃ Newcastle United ពិតជាកំពុងចាប់អារម្មណ៍មកលើ Kepa តែយ៉ាងណាក្លឹបតោខៀវ Chelsea ក៏បានដាក់តម្លៃមកហើយ គឺ ៥០ លានផោន។ នេះប្រសិនមិនទាន់ចង់ចាយលុយទាំងដុំ ក្លឹប Newcastle ក៏អាចលៃលកខ្ចីជើងបាន តែសុំដាក់កិច្ចព្រមព្រៀងទិញផ្តាច់កុងត្រានៅពេលបន្ទាប់។
រំឭកថា Kepa បានរងការរិះគន់ខ្លាំង នៅកំហុសកាលពីយប់មិញ ក្រោយស៊ុតមិនចូលទីនៅបាល់ប៉េណាល់ទី ទល់ Liverpool ហើយក៏មិនអាចសង្រ្គោះបានសូម្បីតែមួយនៅការស៊ុតទាំង ១០ គ្រាប់របស់កីឡាករហង្ស៕
ប្រភព៖ Daily Star