ក្លឹបកាំភ្លើងធំ Arsenal ត្រូវបានគេរាយការណ៍ថា កំពុងចាប់អារម្មណ៍ចង់បន្តកុងត្រាថ្មី ដល់យុវជន Bukayo Saka បើទោះបីសុពលភាពកុងត្រាបច្ចុប្បន្ន សេសសល់រយៈពេលយូរទៅមុខទៀតក៏ដោយ។ ក្រុមដឹកនាំដោយលោក Mikel Arteta ហាក់ពេញចិត្តលើសមត្ថភាពកីឡាករអង់គ្លេសជាខ្លាំង ដោយរដូវកាលនេះ បង្ហាញខ្លួន ២០ ប្រកួត រកបាន ៤ គ្រាប់និង Assist ៤ លើក។
Saka គេក៏ទើបតែចុះហត្ថលេខាលើកុងត្រាថ្មី កាលពីឆ្នាំទៅដែរ ដោយមានសុពលភាពដល់ចុងខែមិថុនា ឆ្នាំ ២០២៤។ យ៉ាងណាតាមអ្នកកាសែតលោក Ekrem Konur បានឲ្យដឹងថា ភាគីក្លឹបអាណាព្យាបាល Arsenal គឺចង់បន្តកុងត្រាបន្ថែមទៀតដល់យុវជនវ័យ ២០ ឆ្នាំ ពោលឲ្យដល់រដូវក្តៅ ឆ្នាំ ២០២៧ ជារួមលើកុងត្រាចាស់ ៣ ឆ្នាំ។
ការធ្វើបែបនេះ គឺដើម្បីធានាថា ខ្សែបម្រើស្លាបខាងលើ នឹងមិនងាយមានក្លឹបណាចូលមកចរចារួចឡើយ ហើយក៏នឹងរុញឲ្យតម្លៃខ្លួនរបស់គេ ឡើងកាន់តែខ្ពស់ផងដែរ។ បើតាមហាងឆេងបច្ចុប្បន្ន កីឡាករអង់គ្លេស អាចថ្លៃល្បាក់ជិត ៦០ លានផោន៕
ប្រភព៖ Sportsmole