FIFA បានប្រកាសនូវទិន្នន័យចំណាត់ថ្នាក់ថ្មី សម្រាប់ Ranking ទូទាំងសកលលោក ហើយយើងឃើញថា ក្រុមជម្រើសជាតិកម្ពុជាបានមានការប្រែប្រួល ឡើងចំណាត់ថ្នាក់ (+) ដល់ទៅ ៨ លេខ។
វាជាលទ្ធផលដ៏អស្ចារ្យមួយ បន្ទាប់ពីក្រុមគោព្រៃយកឈ្នះទៅកោះហ្គាមទាំង ២ ប្រកួតកាលពីពេលកន្លងទៅ ហើយរំកិលលំដាប់ពិន្ទុពី ៩៥០ មក ៩៧០ ពិន្ទុ ពោលកើនឡើងដល់ទៅ ២០ ពិន្ទុឯណោះ។ ចំណាត់ថ្នាក់នេះកម្ពុជា ធ្វើបានល្អច្រើន បើធៀបនឹងឡាវឈរលេខ ១៨៥ បង់ក្លាដេស ១៨៧ និងប្រុយណេ ១៨៩។ ដោយឡែកធៀបណេប៉ាល់ឈរលេខ ១៧៩ មាន ៩៧២ ពិន្ទុ និង ឥណ្ឌូណេស៊ីលេខ ១៦៥ មាន ៩៨៥ ពិន្ទុ។
ទៅមើលលំដាប់ពិភពលោកឯណោះវិញ គឺបែលហ្សិកនិងប្រេស៊ីលបន្តឈរលេខ ១/២ ដដែល តែលំដាប់ពិន្ទុក្រុមសាំបាប្រេស៊ីល ក៏រំកិលឡើង ៨,៦៣ ពិន្ទុបន្ថែម។ ដោយឡែកម្ចាស់ជើងឯកពាន UEFA Nations League គឺបារាំងបានឡើងមកលេខ ៣ តាមពីក្រោយដោយអ៊ីតាលី ហើយអង់គ្លេសធ្លាក់ចុះពីរលេខ។ រីឯអេស្ប៉ាញ និងព័រទុយហ្គាល់ ជាក្រុមពីរផ្សេងទៀតដែលមានការប្រែប្រួលចំណាត់ថ្នាក់នៅបញ្ជី Top 10 គឺអេស្ប៉ាញឡើងមកលេខ ៧ ហើយព័រទុយហ្គាល់ធ្លាក់ទៅលេខ ៨៕
ប្រភព៖ FIFA