ព្រៃវែងអេហ្វស៊ី គឺជាក្លិបបាល់ទាត់អាជីពដំបូងគេ របស់ ផាន សុផេន ហើយគេពិតជាសប្បាយចិត្តដែលបានធ្វើឲ្យបំណងក្លាយជាការពិត។ នេះជាការលើកឡើងពី ខ្សែប្រយុទ្ធវ័យ ក្មេងដែលបានផ្លាស់ពីក្រុមខេត្តបន្ទាយមានជ័យ ទៅក្រុមក្របខណ្ឌ Metfone Cambodian League ត្រៀមជើងទី២រដូវកាល២០២១។
ការមកលេងក្រុមអាជីពលើកដំបូងនេះជាការសម្រេចបំណងមួយ ប៉ុន្តែ សុផេនទទូចថា នឹងប្រឹងប្រែងថែមទៀតដើម្បីទទួលបានឱកាសចូលលេង។
កីឡាករលេចធ្លោប្រចាំក្រុមប៊ុនកយដែលតំណាងខេត្តបន្ទាយមានជ័យក្នុងពានសម្ដេចអគ្គមហាសេនាបីតេជោ ហ៊ុន សែន ថ្នាក់ខេត្ត ២០២១ ថ្លែងបែបនេះ “៖ ក្នុងការមកលេងនៅព្រៃវែងនេះជាជំហានដំបូងក្នុងបាល់ទាត់អាជីព។ ខ្ញុំខំប្រឹងប្រែងហ្វឹកហាត់ ស្ដាប់គ្រូ ពង្រឹងសមត្ថភាពខ្លួនឯងទៀតដើម្បីបានឱកាសចូលលេង។ ខ្ញុំសប្បាយចិត្តដែលបានមកកាន់ទីនេះ និងសម្របខ្លួនក្នុងក្រុម និងការហ្វឹកហាត់ បាន៧០ភាគរយហើយ។ ខ្ញុំនឹងខំអស់ពីសមត្ថភាពមិនឲ្យក្រុមខកបំណងទេ។”
ផាន សុផេន ផ្ដើមការហ្វឹកហាត់បាល់ទាត់ក្នុងក្រុមយុវជន Victory Poipet ដែលមានលោក សាប៊ូន វិនតា ជាគ្រូបង្វឹក។ ក្រោយលោក សាប៊ូន វិនតា ផ្លាស់ទៅធ្វើការនៅរាជធានីភ្នំពេញ គេក៏បានចូលរួមជាមួយក្រុមអធិរាជភ្នំស្វាយ ហើយក៏បន្តទៅក្រុមប៊ុនកយដល់បច្ចុប្បន្ន។
៥ប្រកួតក្នុងវគ្គចែកពូលនៃពានរង្វាន់សម្ដេចអគ្គមហាសេនាបតីតេជោ ហ៊ុន សែន ថ្នាក់ខេត្តកន្លងទៅ ផាន សុផេន រកបាន៨គ្រាប់ ឈរលើគេជាបណ្ដោះអាសន្នក្នុងតារាង Top Scorer ខណៈបន្ទាយមានជ័យឈរលេខ២ ក្នុងពូល “ខ”។ គេរកបានហ៊ែតទ្រីកក្នុងជំនួបបើកឆាកវគ្គចែកពូលថ្នាក់ខេត្ត ២០២១ ឈ្នះពោធិ៍សាត់។ សម្រាប់ការប្រកួតពានសម្ដេចតេជោ ហ៊ុន សែន ថ្នាក់ខេត្ត ដែលនឹងត្រលប់មកវិញនាពេលឆាប់ៗខាងមុខ សុផេន មិនអាចជួយបន្ទាយមានជ័យបន្តទៀតទេ៕
ប្រភព: CNCC