ឆ្លងកាត់ការប្រកួត១០លើកក្នុងក្របខណ្ឌ Metfone Cambodian League 2021 ខ្សែបម្រើវ័យ ក្មេង ចាន់ សុភា ចូលលេងបាន៦ដងក្នុងក្រុមថ្មីអង្គរថាយហ្គឺរ ដែលចំណោម៦ប្រកួតនោះ មាន៣លើកស្ថិតនៅជម្រើស១១នាក់ដំបូង និង៣ដងទៀតប្ដូរចូល។ គេថា មកកាន់ក្រុមថ្មីនេះ គេមានឱកាសចូលលេងបានច្រើនជាងកាលនៅណាហ្គាវើលដ៍ ធ្វើឲ្យគេកាន់តែមានទំនុកចិត្តខ្លាំងជាងមុននៅទីលាន។
ការរំពឹងទទួល បាន ឱកាសលេងច្រើននៅអង្គរថាយហ្គឺរក៏ជាហេតុផលដែលអតីតកីឡាករវេស្ទើនភ្នំពេញសម្រេចចិត្តចាកចេញពីណាហ្គាវើលដ៍នាដំណាច់រដូវកាល២០២០កន្លងទៅដែរ។ គេក៏សង្ឃឹមថា នឹងទទួល បានទំនុកចិត្តកាន់តែខ្លាំងថែមទៀតពីគ្រូបង្វឹក ពេលប្រកួតពានរង្វាន់សម្ដេចអគ្គមហាសេនាបតីតេជោ ហ៊ុន សែន ដែលប្រើតែធនធានកីឡាករក្នុងស្រុក។
ចាន់ សុភា រៀបរាប់ “៖ ការមកដល់ថាយហ្គឺរនេះ ខ្ញុំដាក់គោលដៅមានឱកាសលេងច្រើន ប្រកួតប្រជែងក្នុងក្រុម។ បើប្រៀបធៀបជាមួយក្រុមចាស់ គឺនៅថាយហ្គឺរខ្ញុំមានឱកាសលេងបានច្រើនជាង។ មួយទៀត ខ្ញុំមកនេះ ព្រោះរំពឹងថា នឹងមានឱកាសបង្ហាញខ្លួនក្នុងជម្រើស១១នាក់ក្នុងពានសម្ដេច ខ្ញុំមានទំនុកចិត្តលើខ្លួន។ ចំពោះការលេងបានច្រើនជាងមុនបែបនេះ ក៏ជួយឲ្យខ្ញុំមានទំនុកចិត្តច្រើនលើទីលាន។”
កីឡាករធ្លាប់ហ្វឹកហាត់ក្នុងក្រុមយុវជនអាយុក្រោម១៧ឆ្នាំបឹងកេតទទួល ស្គាល់អង្គរថាយហ្គឺរក៏មានការប្រកួតប្រជែងក្នុងក្រុមខ្លាំងដែរ ជាពិសេសរ៉ូលរបស់គេ មានកីឡាករបរទេសថែមទៀត។ យ៉ាងណា គេនៅតែបន្តប្រឹងប្រែងហ្វឹកហាត់ដើម្បីទទួល បានឱកាសចូល លេងជាបន្តបន្ទាប់ទៀត។
ចាន់ សុភា បានសម្រេចចិត្តចូលរួមជាមួយអង្គរថាយហ្គឺរ ក្រោយចំណាយពេល២រដូវកាលនៅណាហ្គាវើលដ៍ពី២០១៩ដល់២០២០៕
អត្ថបទ៖ CNCC