សមាគមកីឡាបាល់ទាត់ងយោធពលខេមរភូមិន្ទបានប្រកាសពីការចុះហត្ថលេខាផ្ទេរយកខ្សែប្រយុទ្ធ Timothy Okereke នៅថ្ងៃចន្ទ ទី០៩ ខែសីហា នេះដោយមានសុពលភាពដល់ដាច់រដូវកាល២០២១។
Timothy បានអវត្តមាន ពីក្របខណ្ឌ Metfone Cambodian League ក្នុងជើងទី១រដូវកាល២០២១ ចាប់តាំងពីចប់កិច្ចសន្យានៅភ្នំពេញក្រោននាដំណាច់រដូវកាលល២០២០។ អំឡុងទំនេររយៈពេល៧ខែកន្លងមកនេះ គេបាន ព្យាយាមហ្វឹកហាត់រក្សាកាយសម្បទា និងកម្លាំងមិនឲ្យស្រកស្រុតឡើយ ហើយថា បានត្រៀមខ្លួនរួចជាស្រេចក្នុងការបង្ហាញខ្លួនសាជាថ្មីនាពេលខាងមុខ។
ខ្សែប្រយុទ្ធជនជាតិនីហ្សេរីយ៉ារៀបរាប់បែបនេះ “៖ ខ្ញុំពិតជារីករាយដែលបានត្រលប់មកវិញ បន្ទាប់ពីមិនបានលេងរយៈពេល៧ខែមកនេះ ហើយក្ដីរំពឹង និងការតាំងចិត្តរបស់ខ្ញុំនៅតែដដែល។ ការជួយក្រុមទទួល បាន ជ័យជម្នះ និងទីតាំងដ៏សមស្រប គឺជាអាទិភាពរបស់ខ្ញុំ។ កន្លងមកនេះ ខ្ញុំព្យាយាមដាក់គោលការណ៍ខ្លួនឯងឲ្យបាន fit ១០០ភាគរយ សម្រាប់ការត្រលប់មកវិញនេះ ហើយខ្ញុំក៏បានត្រៀមរួចរាល់ហើយដែរ។ បើនិយាយពីការប្រកួតនៅលីគកំពូលកម្ពុជារដូវកាលនេះវិញ វាពិតជាល្អប្រសើរជាងមុន និងប្រកួតប្រជែងខ្លាំងជាងមុន ព្រោះក្រុមទាំងអស់សុទ្ធតែចង់ឈ្នះមិនថា ស្ថានការណ៍ម៉េចទេ។ អាហ្នឹងហើយដែលធ្វើឲ្យការប្រកួតកាន់តែតានតឹង និង ធ្វើឲ្យលីគកាន់តែប្រសើរជាងមុន។”
បើតាមការបញ្ជាក់ពីលោក ថោង ឧត្តម អ្នកចាត់ការទូទៅសមាគមកីឡាបាល់ទាត់ងយោធពលខេមរភូមិន្ទ Timothy ដែលបានចូលហ្វឹកហាត់មួយសប្ដាហ៍មកហើយនោះ ត្រូវបានជ្រើសរើសជំនួសកន្លែងរបស់ កីឡាករប្រេស៊ីល Cristiano Santos ។
គួររំឭកថា Timothy Okereke បានឈានជើងមកប្រកបអាជីពបាល់ទាត់នៅកម្ពុជាក្នុងឆ្នាំ២០១៥ ដោយលេងនៅស៊ីម៉ាក់យូណាយធីតដល់ឆ្នាំ២០១៦ មុនផ្លាស់ទៅខេមបូឌានថាយហ្គឺរ ឆ្នាំ២០១៧។ លេងនៅថាយហ្គឺរមួយរដូវកាល កីឡាករវ័យ២៧ឆ្នាំបានទៅចូលរួមជាមួយអាស៊ីអឺរ៉ុបយូណាយធីត ជុំទី១ រដូវកាល២០១៨ និងផ្ទេរទៅក្លិប UiTM ដែលកាលណោះនៅក្របខណ្ឌទី២ម៉ាឡេស៊ី ជុំទី២ ឆ្នាំដដែល។ ឆ្នាំ២០១៩ គេបានត្រលប់មកកម្ពុជាវិញ និងចូលរួមជាមួយអង្គរថាយហ្គឺរម្ដងទៀត។ ខ្សែប្រយុទ្ធមាឌធំក៏ផ្ទេរទៅភ្នំពេញក្រោនក្នុងរដូវកាល២០២០ និងរកបាន១២គ្រាប់៕
ប្រភព៖ CNCC
ប្រភពរូប៖ TIFFY ARMY Football Club-សមាគមកីឡាបាល់ទាត់ ខ ភ ម