ការប្រកួតកីឡាបាល់ទាត់ក្របខ័ណ្ឌលីគកំពូលកម្ពុជា រដូវកាល២០២១ បានត្រឡប់មកវិញហើយ សម្រាប់សប្តាហ៍ទី១ នាថ្ងៃសៅរ៍-អាទិត្យ ថ្ងៃទី០៦-០៧ ខែមីនា ឆ្នាំ២០២១ ចំនួន៦ប្រកួត ក្នុងចំណោម១៣ក្រុម ដែលចូលរួមប្រកួតប្រជែងម្ចាស់ដំណែងជើងឯក ដូចរដូវកាល ២០២០ ដែលមាន១៣ក្រុមដូចគ្នា។
ចំពោះការប្រកួតនៅថ្ងៃសៅរ៍ ទី០៦ ខែមីនា ឆ្នាំ២០២១ ដែលមាន៣ប្រកួតនោះ គឺជាការជួបគ្នារវាងម្ចាស់ផ្ទះ សូលទីឡូអង្គរ និងក្រុមភ្ញៀវ ភ្នំពេញក្រោន ក្រុមដែលប្រើប្រាស់កីឡាករខ្មែរសុទ្ធ អគ្គិសនីកម្ពុជា ប៉ះជាមួយនគរបាលជាតិ ខណៈក្រុមចំណូលថ្មី និងជាក្រុមជើងឯកលីគទី១ ក្រុមខេត្តព្រៃវែង នឹងត្រូវប្រជែងពិន្ទុជាមួយអង្គរថាយហ្គឺរ។
ដោយឡែក៣ប្រកួតទៀតសម្រាប់ថ្ងៃអាទិត្យ ទី០៧ ខែមីនា ឆ្នាំ២០២១ គឺជាការជួបគ្នារវាងក្រុមការពារម្ចាស់ដំណែងជើងឯករដូវកាល២០២០ បឹងកេតនឹងត្រូវប្រជែងតតាំងជាមួយណាហ្គាវើលដ៍ ខណៈគិរីវង់សុខសែនជ័យ ប៉ះជាមួយអាស៊ីអឺរ៉ុបយូណាយធីត រីឯវិសាខា ជួបជាមួយកងយោធពលខេមរភូមិន្ទ។សម្រាប់រដូវកាល ២០២១នេះ ក្រុមថ្មី១ក្រុម គឺព្រៃវែងFC ដែលជាក្រុមជើងឯកលីគលំដាប់ទី២បានឡើងមកលីគកំពូលកម្ពុជានេះ ដោយ១ក្រុមនៅបាតតារាងធ្លាក់ទៅលេងនៅលីគទី២វិញ នោះគឺក្រុមយុវជនសាលាបាល់ទាត់ជាតិបាទី៕