ក្រុមបាល់ទាត់ Cambodian Fan Club All Stars ឬហៅកាត់ CFA ទើបតែបញ្ចប់កម្មវិធីសប្បុរសធម៌លើកទី ៤ កាលពីពេលថ្មីៗនេះ ហើយវាជាជោគជ័យដ៏ធំធេងមួយទៀតក្នុងអត្ថន័យផ្សារភ្ជាប់ ការលេងកីឡាទៅក្នុងការងារសង្គម។
ឆ្លងកាត់រយៈពេលនៃការបង្កើតក្រុមជាង ១ ឆ្នាំកន្លះ បើទោះបីជា CFA ពុំមែនជាក្រុមអាជីព និងត្រឹមជាក្រុមបាល់ទាត់ដ៏តូចមួយក្តី ប៉ុន្តែពួកគេបានប្រមែប្រមូលបង្កើតនូវសកម្មភាពដ៏គួរឲ្យចាប់អារម្មណ៍ជាច្រើនលើកច្រើនសារ ហើយជាពិសេសផ្ទុះការគាំទ្រពីបងប្អូនលើការងារសប្បុរសធម៌ដែលប្រមូលលុយបានជាង ១ មុឺនដុល្លារឯណោះ។
ខាងក្រោមទំព័រ CTS Sports សូមធ្វើសរុបព្រឹត្តិការណ៍សប្បុរសធម៌ ៤ លើកដែល CFA ធ្លាប់បានសម្រេចកន្លងមក៖
១) ការជួយប្អូនស្រី ស៊ាន ស្រីនិច្ច
ជាក្មេងស្រីដែលមានជីវភាពខ្វះខាតហើយត្រូវការលុយជាចាំបាច់ដើម្បីវះកាត់ជើងម្ខាង ក៏ត្រូវបានក្រុម CFA ទទួលដំណឹង ហើយប្រមែប្រមូលគ្នាបង្កើតកម្មវិធីមួយឡើងកាលពីពាក់កណ្តាលខែមិថុនា ឆ្នាំ ២០២០។ ត្បិតវាជាលើកដំបូងនៃការបង្កើតកម្មវិធីសប្បុរសធម៌ តែ CFA ដែលមានលោក អៃ សំអូន ជាអ្នកតំណាង ក៏ទទួលបានជោគជ័យធំ ប្រមូលបានលុយ ២ ពាន់ដុល្លារ ល្មមនឹងអាចជាចំណែកជួយក្មេងស្រីអាយុ ១៣ ឆ្នាំឲ្យទទួលបានការវះកាត់ដោយជោគជ័យ។
២) ការជួយប្អូនស្រី សន សារ៉ាត់
រំលងបានមួយខែនៅឯតារាង AUPP មានជំនួប 2MBET Derby កើតឡើង ដោយជាការប៉ះគ្នារវាងក្រុម CFA និង PEKMI FC ហើយក្រៅពីជាការប្រកួតមិត្តភាព CFA ក៏ឈរលើគោលដៅធំដើម្បីជួយដល់ប្អូនស្រី សន សារ៉ាត់ ដែលមានជំងឺមហារីកខួរឆ្អឹងគ្មានលទ្ធភាពព្យាបាល។ កាលនោះ CFA ប្រមូលថវិកាបានជាង ១ ៦០០ ដុល្លារជួយដល់ប្អូនស្រីដែលមានទីស្នាក់អាស្រ័យនៅឯខេត្តកណ្តាល។
៣) ការជួយប្អូនស្រី វ៉ែន ចាន់រ៉ា
ឆន្ទៈក្នុងការចូលរួមការងារសង្គម សម្រាប់ CFA នៅតែមិនបោះបង់ ហើយលើកទី ៣ នេះកាន់តែទទួលបានជោគជ័យគួរឲ្យកត់សម្គាល់ និងមានការចេញលិខិតសរសើរដែលទទួលស្គាល់ដោយឯកឧត្តមនាយឧត្តមសេនីយ៍ កែ គឹមយ៉ាន ឧបនាយករដ្ឋមន្រ្តីប្រធានអាជ្ញាធរជាតិប្រយុទ្ធប្រឆាំងគ្រឿងញៀនថែមទៀតផង។
ក្នុងការប្រកួតនោះគឺទទួលបានការគាំទ្រជាពិសេសពីប្រធានក្លឹបបាល់ទាត់វិសាខា លោកជំទាវ កែ សួនសុភី ដែលបានឧបត្ថម្ភទឹកប្រាក់ដល់ទៅ ២ ០០០ ដុល្លារ នាំឲ្យថវិកាសរុបនៅកម្មវិធីកាលនោះទទួលបានដល់ ៣ ៨៦៨ ដុល្លារ ហើយជាងនេះឯកឧត្តម ស សុខា ក៏បានបង្ហាញការស្ងើចសរសើរចំពោះសកម្មភាពក្រុម CFA ជាពន់ពេកផងដែរ។ លុយដែលទទួលបានទាំងអស់ គឺ CFA យកទៅជួយប្អូនស្រី វ៉ែន ចាន់រ៉ា ដែលខ្វះខាតថវិកា និងទាមទារការវះកាត់ជំងឺដុះសាច់លើផ្ទៃមុខកម្រិតធ្ងន់។
៤) ការជួយបងស្រី ជុន សូរ៉ា
រំលងចូលមកដល់ថ្ងៃទី ២០ កុម្ភៈ ឆ្នាំ ២០២១ កន្លងទៅ នៅឯតារាង AIA Stadium មានការជួបជុំនៅកីឡាករពីសំណាក់ក្រុមទាំង ៥ និងសិល្បករល្បីៗជាច្រើនចូលរួម ក្នុងគោលដៅរៃអង្គាសថវិកាជួយដល់បងស្រី ជុន សូរ៉ា ដែលមានជំងឺដុះសាច់លើផ្ទៃមុខ បាន ៣ ៤៩៦ ដុល្លារ។
នៅកម្មវិធីនោះ CFA ក៏បានថ្លែងអំណរគុណយ៉ាងជ្រាលជ្រៅដល់ការផ្តល់កិត្តិយសពីសំណាក់ ឯកឧត្តមនាយឧត្តមសេនីយ៍ ឈន សារ៉េណេ និងលោកជំទាវ ដែលបានអញ្ជើញចូលរួមកម្មវិធី និងការចេញលិខិតសរសើរដល់ក្រុម CFA ដែលបានចូលរួមការងារសង្គមជារឿយៗផងដែរ៕