នៅរយៈពេលចុងក្រោយ មានការលើកឡើងជារឿយៗតាមរយៈពាក្យសម្តីរបស់បេក្ខភាពប្រធានក្លឹបដូចជាលោក Victor Font ជាដើម ដែលនិយាយថាក្លឹប Barcelona នឹងនាំយក Eric Garcia ត្រលប់មក Camp Nou វិញ ទាំងដែលកុងត្រារបស់ខ្សែការពារវ័យក្មេងរូបនេះត្រូវផុតនៅចុងខែមិថុនា ឆ្នាំ ២០២១។
យ៉ាងណាមិញអ្នកចាត់ការលោក Pep Guardiola និងធ្លាប់ជាអតីតបុគ្គលិកស្ថិតក្រោមការដឹកនាំរបស់ Font បានចេញមុខមកនិយាយបែបនេះថា៖ “ខ្ញុំមិនចង់និយាយអ្វីច្រើនទេអំពីរឿងនេះ ព្រោះមានមនុស្ស [សំដៅដល់ភាគី Barcelona] និយាយអំពីវាច្រើនពេក”។
លោកបន្ត៖ “Garcia គេជាកីឡាកររបស់យើង ហើយទីផ្សារដោះដូរក៏នឹងបញ្ចប់នៅប៉ុន្មានថ្ងៃខាងមុខនេះហើយ ដោយយើងនៅតែប្តេជ្ញាចិត្តពេញទំហឹងជាមួយគេ ព្រោះគេជាកីឡាករល្អមួយរូប”។
បញ្ជាក់ថាមេឃខៀវកំពុងឈរលើគោលជំហរប្រជែងពាន Premier League នារដូវកាល ២០២០/២១ ក្រោយពីយកឈ្នះប៉ុន្មានប្រកួតចុងក្រោយ រំកិលឡើងមកឈរកំពូលតារាងនាំមុខក្រុមលេខ ២ Man Utd ១ ពិន្ទុ និងនៅសល់ ១ ប្រកួតក្នុងដៃ៕
ប្រភព៖ AF