Zenit បានឡើងទៅវគ្គបន្ដហើយក្នុងពានរង្វាន់ Europa League ក្រោយពីវាយបកយកឈ្នះលើក្រុម Dinamo Minsk ក្នុងលទ្ធផល ៨-៥ គិតទាំងពីរជើង។
កាលពីជើងទី១កន្លងទៅ Zenit បរាជ័យក្នុងលទ្ធផល ៤-០ ម្ដងមកហើយ ដែលធ្វើឱ្យក្រុម Dinamo Minsk សឹងតែគិតថាខ្លួនមានឱកាសច្រើនបំផុតដើម្បីឡើងទៅវគ្គបន្ដ។ យ៉ាងណាមិញ នៅជើងទី២ យប់មិញនេះ ក្រុមរុស្ស៊ីបែរជាអាចបង្កើតជារឿងភ្ញាក់ផ្អើលមួយទៅវិញ ដោយអាចយកឈ្នះក្នុងលទ្ធផល ៤-០ លើក្រុម Dinamo Minsk បើទោះជាពួកគេមានគ្នាត្រឹម១០នាក់ក៏ដោយ។ ក្រោយពីលេងទាំងពីរជើង ស្មើគ្នា ៤-៤ នេះហើយ ការប្រកួតតម្រូវឱ្យពួកគេត្រូវថែម១៥នាទី២ដង ដើម្បីកាត់សេចក្ដី។
វគ្គថែមម៉ោងនេះ កាន់តែជក់ចិត្តថែមទៀត ដោយក្រុម Dinamo Minsk ជាអ្នករកគ្រាប់បាល់បាន១គ្រាប់មុន ប៉ុន្តែមិនរក្សាលទ្ធផលនេះបានឡើយ។ ដោយ Zenit ដែលមានគ្នាត្រឹម១០នាក់នោះ អាចរកគ្រាប់បាល់បានផ្ទួនៗគ្នា ដល់ទៅ៤គ្រាប់បន្ថែមទៀត ដើម្បីយកឈ្នះក្នុងការប្រកួតជើងទី២នេះ ៨-១ ឬគិតទាំងពីរជើងទៅ ៨-៥។
នេះជាការវាយបកសាហាវបំផុតមួយក្នុងប្រវត្តិសាស្ត្ររបស់លីគអឺរ៉ុបហើយ ដែលមានគ្នាត្រឹម១០នាក់សោះ តែអាចបង្កើតឱកាសនិងរកគ្រាប់បាល់បានទទួលជ័យជម្នះថែមទៀត៕ប្រភព៖ DailyMail
