ខ្សែបម្រើប្រយុទ្ធរបស់ក្លឹបកាំភ្លើងធំ Arsenal គឺ Mesut Ozil ត្រូវបានគេរាយការណ៍ថា កំពុងចរចាបែបសម្ងាត់មួយ ជាមួយភាគីខាងក្លឹប Fenerbahce របស់ប្រទេសទួរគី អំពីលទ្ធភាពនៃការចាកចេញនៅរដូវក្តៅឆ្នាំ ២០២១ ខាងមុខ។
បញ្ជាក់ថា Ozil មិនទាន់បានបង្ហាញខ្លួនលើទីលានឲ្យកាំភ្លើងធំតាំងពីខែមិនា ក្រោយអ្នកចាត់ការលោក Mikel Arteta មិនជ្រើសរើសឈ្មោះរបស់លោកឲ្យចូលរួមការប្រកួត មិនថាតែពាន Europa League ឬ Premier League។
កីឡាករវ័យ ៣២ ឆ្នាំហាក់រកដំណោះស្រាយជាមួយ Arsenal មិនចេញទាល់តែសោះ ខណៈកុងត្រាត្រូវបញ្ចប់នៅរដូវក្តៅឆ្នាំក្រោយទៅហើយ។ មួយផ្សេងទៀតគេជឿថាក្លឹបក៏មិនចង់ទុកជើង Ozil ដែរ ព្រោះត្រូវចំណាយប្រាក់ពលកម្មក្រាស់ក្រែល។
បែបនេះការចាកចេញអាចជាជម្រើសល្អសម្រាប់ភាគីទាំងសងខាង ហើយការផ្ទេរទៅក្លឹប Fenerbahce គឺមានភាគរយខ្ពស់ជាងបណ្តាក្លឹបណាទាំងអស់។ នៅខែមករាខាងមុខ មានដំណឹងថា Ozil ទំនងជាចុះហត្ថលេខាលក្ខណៈ Pre-Contract បណ្តើរៗហើយ៕ ប្រភព៖ Sportsmole