ក្លិបម្ចាស់ជើងឯកលីគកំពូលកម្ពុជារដូវកាល២០២០បឹងកេតអេហ្វស៊ីនៅថ្ងៃនេះបានប្រកាសចុះកុងត្រាយកខ្សែបម្រើប្រយុទ្ធវ័យក្មេងសញ្ជាតិខ្មែរសាន គឹមហេងក្រោយកីឡាកររូបនេះចាកចេញពីក្លិបវិសាខា ក្រោយរួមរស់អស់រយៈពេល៣ឆ្នាំ។
នេះគឺជាកីឡាករនាំចូលដំបូងរបស់បឹងកេតសម្រាប់ត្រៀមរដូវកាលថ្មីឆ្នាំ២០២១ ខណៈក្លិបបាល់ទាត់ខាងលើត្រូវមានភារកិច្ចច្រើន គឺការពារតំណែងជើងឯកលីគកំពូលកម្ពុជា ប្រកួតប្រជែងពានរង្វាន់សម្ដេច ហ៊ុន សែន និងពានរង្វាន់លំដាប់អាស៊ី AFC Cup វគ្គជម្រុះក្នុងពូលតទៅ។
សាន គឹមហេងគឺអតីតយុវជនថ្នាលរបស់សាលាបាល់ទាត់ជាតិបាទី ហើយបានផ្លាស់មកក្លិបវិសាខាកាលពីឆ្នាំ២០១៨ ។ ២រដូវកាលដំបូងរូបគេក្លាយជាសមាជិកលេងបានទៀងទាត់ហើយរកបានគ្រាប់បាល់ជាច្រើនផងដែរ ដែលកាលនោះដឹកនាំដោយលោក ហុក សុជីវ័ន្ត។
ចូលរដូវកាល ២០២០ រូបគេក្លាយកីឡាករមិនសូវមានឱកាសលេងក្រោយក្លិបនាំចូលកីឡាករល្អៗច្រើន។ តែយ៉ាងណា!រូបគេជាសមាជិកម្នាក់របស់វិសាខាជួយក្លិបលើកពានសម្ដេចហ៊ុន សែនឆ្នាំ២០២០ផងដែរ៕