Diego Maradona បានទទួលមរណភាពកាលពីថ្ងៃពុធកន្លងទៅនេះ ដោយសារជំងឺគាំងបេះដូងនៅឯផ្ទះក្នុងប្រទេសកំណើតអាហ្សង់ទីន នេះគឺក្រោយរយៈពេលពីរសប្តាហ៍នៃការចាកចេញពីមន្ទីរពេទ្យ បន្ទាប់ពីវះកាត់ឈាមហូរក្នុងខួរក្បាលបានជោគជ័យ។
ម្ចាស់ជើងឯក World Cup ឲ្យអាហ្សង់ទីននៅឆ្នាំ ១៩៨៦ ត្រូវបានគេស្គាល់ជា អតីតវីរបុរសក្នុងពិភពបាល់ទាត់មួយរូប ដែលទទួលបានភាពល្បីល្បាញខ្លាំងក្នុងកំឡុងទសវត្សឆ្នាំ ៨០ មុនប្រកាសចូលនិវត្តនៅឆ្នាំ ១៩៩៧។
ដោយសារតែជំងឺញាំញីឥតស្រាកស្រាន្ត ស្ថានភាពសុខភាពរបស់ Maradona ក៏កាន់តែចុះខ្សោយទៅនៅរយៈពេលប៉ុន្មានខែចុងក្រោយ។ បើតាមរបាយការណ៍ពី DailyMail ចុះផ្សាយថា នៅព្រឹកថ្ងៃពុធកន្លងទៅ Maradona បានចុះពីបន្ទប់គេង មកបរិភោគអាហារពេលព្រឹក ហើយមើលទៅលោកមានសភាពស្លេកស្លាំង និងដឹងខ្លួនឯងដូចគ្នាថាមានអារម្មណ៍រៀងរងាខុសធម្មតា។
ពាក្យមួយម៉ាត់ចុងក្រោយដែល Maradona បាននិយាយទៅក្មួយប្រុសរបស់លោក មុនឡើងមកសម្រាកវិញ នោះគឺលោកនិយាយថា៖ “Me siento mal,” (ជាភាសាអេស្ប៉ាញដែលជនជាតិអាហ្សង់ទីនប្រើប្រាស់) ដោយវាមានន័យថា “ខ្ញុំមានអារម្មណ៍ថាខ្លួនឯងមិនស្រួលខ្លួនទេថ្ងៃនេះ“។
រហូតដល់ពេលរសៀលគិលានុបដ្ឋាយិកាដែលនៅមើលថែទាំលោក Diego Maradona ក៏ឃើញថាសភាពរបស់ Maradona កាន់តែចុះខ្សោយទៅ ហើយប្រញាប់ខលហៅគ្រូពេទ្យ តែសោកស្តាយពេលមកដល់ លោកបានចែកឋានបាត់ទៅហើយ។
ជាការកាន់ទុក្ខវីរបុរសរូបនេះ ប្រធានាធិបតីប្រទេសអាហ្សង់ទីនលោក Alberto Fernandez បានប្រកាសធ្វើការកាន់ទុក្ខចំនួន ៣ ថ្ងៃនៅទូទាំងប្រទេស៕