ខ្សែប្រយុទ្ធសញ្ជាតិប្រេស៊ីល Paulo Victor Costa Soares បានប្រកាសចាកចេញពីក្លិបភ្នំពេញក្រោនហើយនៅថ្ងៃនេះបន្ទាប់ពីរូបគេសរសេរសារអរគុណ
និងលាដល់ក្លិប និងអ្នកគាំទ្រទាំងអស។
ក្នុងគណនីហ្វេសបុករបស់របស់ខ្លួន កីឡាករប្រេស៊ីលរូបនេះ បានសរសេរជាភាសាអង់គ្លេសដែលមានអត្ថន័យជាភាសាខ្មែរថា៖
“ថ្ងៃនេះ! ខ្ញុំមកទីនេះដោយសេចក្តីស្រឡាញ់ដ៏ច្រើន ដើម្បីថ្លែងអំណរគុណដល់ PPCFC ចំពោះអ្វីគ្រប់យ៉ាង ដែលបានធ្វើសម្រាប់ខ្ញុំចាប់តាំងពីខ្ញុំបានមកដល់ទីនេះ។ ខ្ញុំសូមអរគុណដោយផ្ទាល់ទៅដល់ ក្លឹប កីឡាករទាំងអស់ ក្រុមការងារ និងដៃគូសហការទាំងអស់”។
“ខ្ញុំសូមថ្លែងអំណរគុណដល់អ្នកគាំទ្រ ដែលតែងតែមកពហុកីឡដ្ឋានមើលពួកយើង។ អរគុណច្រើនចំពោះអ្វីគ្រប់យ៉ាង ដែលខ្ញុំបានរស់នៅក្នុងរយៈពេលពីរឆ្នាំនេះនៅទីនេះ។ ខ្ញុំបានបង្កើតមិត្តភក្តិជាច្រើន ហើយបួកគេនឹងនៅជាមួយខ្ញុំអស់មួយជីវិត។ ខ្ញុំសូមជូនពរឱ្យអ្នកទទួលបានជោគជ័យ!”។
Paulo Victor Costa Soares មកចូលរួមជាមួយភ្នំពេញក្រោនកាលពីដើមរដូវកាល២០១៩ហើយចុះកុងត្រារយៈពេល២រដូវកាលនៅក្រុមសិង្ហក្រហម។ ចំណាយពេល២រដូវកាលនោះទីនេះ រូបគេបង្ហាញខ្លួនបាន៣១ប្រកួតនិងរកបាន២៥គ្រាប់ខណៈរដូវកាលនេះជួយភ្នំពេញក្រោនបានលេខ៣ក្នុងពានរង្វាន់ Metfone Cambodian League៕