Cristiano Ronaldo បានវិលត្រលប់មកចូលទីលានប្រកួតវិញហើយកាលពីយប់មិញ ដោយលោកក៏រកបាន ២ គ្រាប់ក្នុងការប្រកួតប៉ះ Spezia ក្រៅទឹកដីផងដែរ។
CR7 ដែលទើបតែជាសះស្បើយពីជំងឺ COVID-19 បានប្រាប់សារព័ត៌មាន Sky Sports ក្រោយចប់ការប្រកួតថា៖ “ខ្ញុំលែងមានរោគសញ្ញាអីហើយ ហើយក៏មានអារម្មណ៍ល្អដែរថ្ងៃនេះ ដោយខ្ញុំអាចវិលត្រលប់មកធ្វើរឿងដែលខ្ញុំចូលចិត្តវិញនោះគឺការលេងបាល់ទាត់”។
លោកបន្ថែម៖ “Serie A ជាលីគដែលមានការប្រកួតប្រជែង ខណៈ Milan កំពុងធ្វើបានល្អ ហើយ Lazio និង Napoli ក៏ដូចគ្នា អ៊ីចឹងយើងត្រូវខិតខំឲ្យបានខ្លាំង តែយើងពេលនេះក៏កំពុងវិវត្តខ្លួនផងដែរ ប៉ុន្តែអ្វីដែលសំខាន់គឺ Cristiano ត្រលប់មកវិញហើយ”។
ទាក់ទងនឹងរឿងធ្វើតេស្ត PCR ដែលកីឡាករព័រទុយហ្គាល់បានខឹងសម្បានិងជេរប្រមាថលើបណ្តាញសង្គមកាលពីថ្ងៃមុន លោកសូមសិទ្ធមិនបញ្ចេញមតិ ដោយត្រឹមនិយាយថា សំខាន់លោកអាចវិលត្រលប់មកវិញ និងក្រុមឈ្នះការប្រកួត៕
ប្រភព៖ Goal