អតីតកីឡាករចូលនិវត្ត Ronaldinho បានបញ្ជាក់កាលពីពេលថ្មីៗនេះ ថាខ្លួនតេស្តឃើញលទ្ធផលវិជ្ជមានមានផ្ទុកជំងឺ COVID-19 ហើយបច្ចុប្បន្នលោកកំពុងរស់នៅដាច់ដោយឡែកក្នុងទីក្រុង Belo Horizonte នៅប្រទេសប្រេស៊ីល។
ប្រាប់កាលពីថ្ងៃអាទិត្យ អតីតខ្សែប្រយុទ្ធ Barca និងជម្រើសជាតិប្រេស៊ីលនិយាយ៖ “ខ្ញុំមកដល់ទីនេះ [ទីក្រុង Belo Horizonte] តាំងពីថ្ងៃម្សិលមិញ ហើយក្រោយការធ្វើតេស្តខ្ញុំឃើញលទ្ធផលវិជ្ជមាន តែខ្ញុំមិនមានរោគសញ្ញាអ្វីអាក្រក់នោះទេ អ៊ីចឹងហើយកម្មវិធីមួយដែលខ្ញុំត្រូវចូលរួម ក៏ត្រូវលើកទៅពេលក្រោយ”។
គួរបញ្ជាក់ថា Ronaldinho កន្លងទៅក៏ទើបតែត្រូវបានឃុំខ្លួនក្នុងពន្ធនាគារអស់រយៈពេល ៣២ ថ្ងៃរួចហើយដែរ ក្នុងប្រទេសប៉ារ៉ាហ្គាយ ក្រោយជាប់ចោទពីបទក្លែងបន្លំលិខិតឆ្លងដែនក្លែងក្លាយ។
Ronaldinho បានបញ្ចប់អាជីពបាល់ទាត់របស់ខ្លួននៅឆ្នាំ ២០១៥ ជាមួយក្លឹប Fluminense ចុងក្រោយគេបង្អស់ ក្រោយពីបានហែលកាត់ក្លឹបធំៗនៅអឺរ៉ុបមានតាំងពី PSG, Barca និង AC Milan ជាដើម៕ ប្រភព៖ Metro