ក្រុមបាល់ទាត់ Cambodian Fan Club All Stars កាលពីពេលថ្មីៗនេះ ទើបតែទទួលបានលិខិតសរសើរដែលទទួលស្គាល់ដោយ ឯកឧត្ដមនាយឧត្ដមសេនីយ៍ កែ គឹមយ៉ាន ឧបនាយករដ្ឋមន្ត្រីប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងចុះហត្ថលេខាដោយឯកឧត្ដមនាយឧត្ដមសេនីយ៍ មាស វិរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន ហើយប្រគល់ជូនតាមរយៈឯកឧត្តម លី ឡាយ ជំនួយការអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានគ្រប់គ្រងអ្នកគាំទ្រក្លិបបាល់ទាត់ វិសាខា។
លិខិតសរសើរដែលទើបចុះហត្ថលេខាកាលពីថ្ងៃទី ១៩ កញ្ញា ឆ្នាំ ២០២០ កន្លងទៅនេះ ផ្តល់ជូនក្នុងគោលបំណងកោតសរសើរដល់ក្រុមបាល់ទាត់ Cambodian Fan Club all Stars ដែលបានចូលរួមក្នុងការប្រកួតបាល់ទាត់សប្បុរសធម៌ នៃយុទ្ធនាការបរិច្ចាគឈាមដោយស្ម័គ្រចិត្ត និងផ្សព្វផ្សាយពីផលប៉ះពាល់ក៏ដូចជាគ្រោះថ្នាក់នៃគ្រឿងញៀន ហើយសូមឲ្យយុវជនទាំងអស់បន្តស្មារតី ចូលរួមលេងកីឡា ក្រោមពាក្យស្លោក៖ “បើស្រលាញ់ខ្លួនឯងនិងគ្រួសារ សូមមេត្តាកុំសេពគ្រឿងញៀន ហើយសូមចូលរួមលេងកីឡាដើម្បីជៀសឆ្ងាយពីគ្រឿងញៀន”។
គួរបញ្ជាក់ថា កម្មវិធីប្រកួតមិត្តភាពសប្បុរសធម៌លើកទី ៣ ដែលផ្តួចផ្តើមឡើងដោយក្រុមបាល់ទាត់ CFA និងក្រុម ៣ ផ្សេងទៀតទើបតែបញ្ចប់ទៅកាលពីចុងសប្តាហ៍មុន ដោយរៃអង្គាសថវិកាបាន ៣ ៩៦៨ ដុល្លារ រាប់ថាជាភាពជោគជ័យកាន់តែធំបន្ថែមទៀតធៀបនឹងពេលមុនៗ៕