កីឡាការិនីបាល់ទាត់ឆ្នើម២៥នាក់នឹងត្រូវទៅបោះជំរំហ្វេឹកហាត់ក្នុងប្រទេសចិន ក្រោយជ្រើសរសើបានពីការបង្កើតពានរង្វាន់ជម្រើសជើងឯកបាល់ទាត់នារីថ្នាក់ជាតិដែលនឹងចាប់ផ្ដើមប្រកួតក្នុងពេលឆាប់ៗនេះ។
ក្នុងពិធីចាប់ឆ្នោតជ្រើសរើសគូប្រកួតកាលពីព្រឹកមិញនៅពហុកីឡដ្ឋានជាតិ លោកស្រី ពុធ ធីតា ប្រធានគណៈកម្មការអភិវឌ្ឍន៍បាល់ទាត់នារី នៃសហព័ន្ធកីឡាបាល់ទាត់កម្ពុជាបាននិយាយថា៖
«…យើងធ្វើឡើងដើម្បីអភិវឌ្ឍន៍បាល់ទាត់នារីក្នុងប្រទេស និងមួយទៀតយើងត្រៀមខ្លួនសម្រាប់ស៊ីហ្គេម នៅវៀតណាម ឆ្នាំ២០២១ និងមួយទៀតយើងមានត្រៀមទៅប្រទេសចិន ដែលយើងត្រូវត្រៀម camping (បោះជំរំ) ចំនួន ៣ឆ្នាំ ហើយដើម្បីឆ្ពោះទៅផែនការយុទ្ធសាស្ត្ររបស់សហព័ន្ធកីឡាបាល់ទាត់កម្ពុជា យើង ១២ចំណុចផងដែរ ហើយដែលសំខាន់ជាងនេះទៅទៀតដែលយើងធ្វើលីគនេះឡើងដើម្បីឆ្ពោះទៅស៊ីហ្គេម ឆ្នាំ២០២០៣ ដែលយើងធ្វើជាម្ចាស់ផ្ទះ។»
«យើងមាន camping (បោះជំរំ) ទៅចិនហ្នឹង ៣ឆ្នាំ ពីឆ្នាំ២០២១ ដល់ឆ្នាំ២០២៣ យើងធ្វើ ២លើក ម្ដងយើងធ្វើ camping ៩០ថ្ងៃ ហើយមូលហេតុដែលយើងធ្វើលីគគឺដើម្បីជម្រើសយក ២៥នាក់ហ្នឹង ដើម្បីទៅ ហើយនិងមន្ត្រីចំនួន ៤នាក់ អ៊ីចឹងសរុបទៅគឺ ២៩នាក់សម្រាប់ទៅចិន។ …គឺយើងហ្វឹកហាត់នៅប្រទេសចិន ហើយគេឧបត្ថម្ភទាំងអស់។»
ការប្រកួតពានរង្វាន់លីគបាល់ទាត់នារី (Cambodian Women’s League) រដូវកាល២០២០ នឹងចាប់ផ្ដើមប្រកួតពីថ្ងៃទី២៧ ខែកញ្ញា ដល់ថ្ងៃទី២៧ ខែធ្នូ ឆ្នាំ២០២០ ដោយប្រើប្រាស់រូបមន្តប្រកួត ជាលក្ខណៈលីគវិលជុំ តែមួយជើងប៉ុណ្ណោះ ដោយមានក្រុមខ្លះអាចនឹងធ្វើម្ចាស់ផ្ទះ ៤ដង ឬ ៥ដង តាមការចាប់ឆ្នោតដែលរៀបចំដោយសហព័ន្ធកីឡាបាល់ទាត់កម្ពុជា៕