នៅថ្ងៃសោរ៍ ទី ១៩ កញ្ញា ឆ្នាំ ២០២០ វេលាម៉ោង ១:៣០ នាទីរសៀលស្អែកនេះ ក្រុមបាល់ទាត់ Cambodian Fan Club All Stars (CFA) នឹងត្រូវប៉ះគ្នាជាមួយក្រុម The Blue Warriors ខណៈ NIDER FC ត្រូវជួបក្រុមស្ទាំងភ្លើងក្មេងវត្តក្តីចាស់ សម្រាប់ប្រកួតពានរង្វាន់មិត្តភាពសប្បុរសធម៌ ដែលមានផ្សាយផ្ទាល់នៅលើទំព័រ VEHA Media។
ការប្រកួតដែលធ្វើឡើងនៅឯកីឡដ្ឋាន ស្តាតចាស់មួយនេះ មានគោលបំណងរៃអង្គាសថវិកាជួយដល់ប្អូនស្រី វ៉ែន ចាន់រ៉ា ដែលកើតជំងឺដុះសាច់លើផ្ទៃមុខ ហើយត្រូវការថវិកាជាចាំបាច់ដើម្បីយកទៅព្យាបាល។
គួររំឭកថា នេះជាកម្មវិធី <<ប្រកួតមិត្តភាពសប្បុរសធម៌>> លើកទី ៣ ហើយដែលក្រុម CFA បានបង្កើតឡើង ហើយពីមួយលើកទៅមួយលើកសន្ទុះគាំទ្រពីសំណាក់សប្បុរសជន បន្តមានកំណើនគួរឲ្យកត់សម្គាល់៕