ខ្សែការពារ Andy Robertson របស់ក្រុម Liverpool ថាមិនចង់ឃើញ Lionel Messi មកលេងនៅអង់គ្លេសឡើយ ដោយចង់ឱ្យគេលេងនៅអេស្ប៉ាញទៀត។
Messi មានទំនាក់ទំនងផ្លាស់មកលេងនៅក្រុម Manchester City កាន់តែខ្លាំងឡើង បន្ទាប់ពីរូបគេបានស្នើសុំចាកចេញពីក្រុម Barcelona ។ យ៉ាងណាមិញ បើតាមសម្ដីរបស់កីឡាករ Robertson ខ្សែការពារ Liverpool បានបញ្ជាក់ថារូបគេមិនចង់ឱ្យកីឡាករអាហ្សង់ទីនមកលេងនៅអង់គ្លេសឡើយ។ ការមិនចង់ឃើញនេះ ក៏ព្រោះតែរូបគេយល់ឃើញថាវត្តមាន Messi នៅក្រុម Man City នឹងធ្វើឱ្យក្រុមនេះកាន់តែខ្លាំងឡើងមិនខាន។
Robertson បាននិយាយថា៖ “ខ្ញុំសង្ឃឹមថាវាមិនកើតឡើងទេ។ ខ្ញុំគិតថា Liverpool មិនអាចចុះកុងត្រាយកគាត់បានឡើយ ដូច្នេះខ្ញុំមិនចង់ឃើញគាត់នៅក្បែរឬមកលេងនៅ Premier League ឡើយ។ ខ្ញុំសង្ឃឹមថាគាត់នឹងនៅឱ្យឆ្ងាយ។ ខ្ញុំធ្លាប់លេងទល់គាត់២ដង ហើយវាជាការប្រកួតពិបាកខ្លាំងណាស់”៕ប្រភព Marca