លោក Julen Lopetegui អ្នកចាត់ការក្រុម Sevilla ថាទាល់តែលេងឱ្យបានដល់កម្រិតកំពូល ទើបអាចយកឈ្នះលើក្រុម Manchester United បាននៅយប់នេះ។ក្រុមខ្លាំងនៅអេស្ប៉ាញ និងត្រូវប្រកួតជាមួយក្រុម Man Utd នៅម៉ោង២រំលងអាធ្រាត្រនេះហើយ សម្រាប់វគ្គពាក់កណ្ដាលផ្ដាច់ព្រ័ត្រពានរង្វាន់ UEFA Europa League ។ សម្រាប់ការប្រកួតនេះដែរ លោក Julen អ្នកចាត់ការក្រុម Sevilla មើលឃើញថាពិតជាពិបាកសម្រាប់ក្រុមរបស់លោក ព្រោះថាបិសាចក្រហមនៅពេលនេះកំពុងលេងបានយ៉ាងល្អមែនទែន ជាមួយកីឡាករពោរពេញដោយកម្លាំងចិត្តចង់ឈ្នះ។
ដើម្បីទម្លាក់បិសាចក្រហមបាននៅយប់នេះ លោក Julen អះអាងថាទាល់តែ Sevilla លេងឱ្យបានល្អបំផុតដល់កម្រិតកំពូលទើបអាចសម្រេចបំណងបាន។ អតីតអ្នកចាត់ការ Real Madrid រូបនេះ និយាយទៀតថា៖ “នេះជាក្រុម United ដែលលេងបានល្អបំផុតប៉ុន្មានឆ្នាំចុងក្រោយនេះ។ ពួកគេបានស្វែងរកផ្លូវលេងល្អមួយ។ យើងនឹងលេងទល់ក្រុមដែលកំពុងឡើងជើង ហើយទាល់តែប្រឹងលេងឱ្យល្អបំផុតទើបអាចឆ្លងផុតពួកគេ”៕
ប្រភព៖ BT