នេះអាចជារឿងសាមញ្ញ ប៉ុន្តែក៏ជាសំណួរចាក់ដោតមួយដែលមានប្រិយមិត្តអ្នកគាំទ្រវិស័យបាល់ទាត់ជាច្រើនប្រាកដជាមិនធ្លាប់បានដឹងពីមុនមកទេ។ តើនៅលើទីលានបាល់ទាត់ក្នុងការប្រកួតនីមួយៗ មានទំហំឬវិមាត្រដូចគ្នាដែរឬទេ? ហើយប្រសិនណាមិនជាដូចគ្នា តើអាចជះផលប៉ះពាល់អ្វីខ្លះដល់ការលេងរបស់កីឡាករ?
ផ្អែកតាមការស្រាវជ្រាវពីប្រភពគេហទំព័រច្បាស់ការ បានឲ្យដឹងថា វិមាត្រនៃទីលានរបស់ក្លឹបបាល់ទាត់ទាំងអស់គឺមិនដូចគ្នាទាំងស្រុងនោះទេ ប៉ុន្តែអាចថាមានភាពប្រហាក់ប្រហែលគ្នា ព្រោះរាល់ស្តង់ដារនៃការកំណត់ទំហំទីលាននីមួយៗ គឺកំណត់យកតាមច្បាប់របស់សហព័ន្ធសមាគមបាល់ទាត់អន្តរជាតិ FIFA។
វិមាត្រស្តង់ដារលើទីលាន គឺ FIFA កំណត់យកផ្នែកទទឹង នៅទំហំអប្បបរមា ៦៤ ម៉ែត្រ និងអតិបរមា ៧៥ ម៉ែត្រ ស្របពេលដែលផ្នែកបណ្ដោយ នៅទំហំអប្បបរមា ១០០ ម៉ែត្រ និងអតិបរមា ១១០ ម៉ែត្រ។
ឧទាហរណ៍ជាក់ស្ដែងដូចជានៅទីលាន Camp Nou របស់ក្លឹប Barcelona គឺមានបណ្តោយ ១០៥ ម៉ែត្រ និងទទឹង ៦៨ ម៉ែត្រ ស្របពេលដែលទីលាន Stamford Bridge របស់ក្លឹប Chelsea គឺមានបណ្ដោយ ១០៣ ម៉ែត្រ និងទទឹង ៦៧ ម៉ែត្រ។ ប៉ុន្តែជាទូទៅតាមការអង្កេតមើល រាល់កីឡដ្ឋានភាគច្រើនគឺជ្រើសយកទំហំ ១០៥x៦៨ ម៉ែត្រជាទំហំស្តង់ដារ។
ប៉ុន្តែការកំណត់នេះ ក៏ស៊ីសងលើកម្រិតអាយុនៃការប្រកួតរបស់កីឡាករផងដែរ ដូចជាថ្នាលយុវជន U13 ឬ U14 ក៏កំណត់យកស្តង់ដារផ្សេង ចន្លោះបណ្ដោយ ៧២ ទៅ ៩១ ម៉ែត្រ និងទទឹង ៤៥ ទៅ ៥៦ ម៉ែត្រ រីឯឈុត U8 ក៏កំណត់យកស្តង់ដារផ្សេងមួយទៀត ចន្លោះបណ្ដោយ ២៧-៤៥ ម៉ែត្រ និងទទឹង ១៨ ទៅ ២៧ ម៉ែត្រ។
បើសួរថាតើភាពខុសគ្នានៃទំហំទីលាន ជះឥទ្ធិពលដល់ការលេងរបស់កីឡាករដែរឬទេ? ចម្លើយ៖ គឺថាអាចប៉ះពាល់មួយផ្នែកដែរ។
ប្រសិនណាវិមាត្រទីលានមានទំហំខុសគ្នាច្រើនលេខ នោះចង្វាក់នៃការលេងរបស់កីឡាករ ក៏ចាំបាច់ត្រូវសម្របទៅតាមទីលាននោះដូចគ្នា។ តួយ៉ាងដូចជាការកាត់បាល់វែងចេញពីជើងរបស់កីឡាករណាមួយ ប្រសិនអ្នកធ្លាប់តែលេងនៅទីលានដែលមានទំហំស្តង់ដារ ហើយប្រែទៅលេងនៅទីលានមួយផ្សេងទៀតដែលរាងតូចឬធំជាងមុនច្រើន នោះការស្មាននៃកម្លាំងជើងក៏ត្រូវផ្លាស់ប្តូរដូចគ្នា។
មួយផ្សេងទៀតវិមាត្រនៃទីលានតូច គឺនាំផលចំណេញច្រើនដល់ប្រព័ន្ធការពារ នោះក៏ដោយសារមិនសូវមានគម្លាតទំនេរច្រើនក្នុងការអូសបាល់ ពីសំណាក់ខ្សែប្រយុទ្ធនៃក្រុមបដិបក្ខ។
នៅឆ្នាំ ២០១៤ នាជំនួបរវាងក្រុមម្ចាស់ផ្ទះ Newcastle United និង Tottenham Hotspur គឺអ្នកចាត់ការលោក Mauricio Pochettino កាលនោះបានរិះគន់ដល់ទីលាន White Hart Lane ជាខ្លាំង ក្រោយពីក្រុមរបស់លោកបានរងបរាជ័យ។ បញ្ជាក់ថាទំហំទីលាន White Hart Lane គឺខុសពីទំហំនៃទីលានទូទៅឆ្ងាយ ដោយមានបណ្ដោយត្រឹម ១០០ ម៉ែត្រ ទទឹង ៦៧ ម៉ែត្រតែប៉ុណ្ណោះ។
លោកនិយាយថា៖ “ទម្រង់លេងរបស់យើងគឺត្រូវការទីតាំងធំ ហើយជាក់ស្តែងមើលទៅទីលាន White Hart Lane គឺរាងតូចបន្តិចហើយ ដោយទំហំបែបហ្នឹងគឺមានភាពល្អប្រសើរទៅវិញទេសម្រាប់ក្រុមដែលលេងការពារខ្លាំង”៕