នៅតារាង AUPP នាវេលាម៉ោង ១៦:០០ នាទីរសៀល ថ្ងៃសោរ៍ ទី ០៤ ខែកក្កដា ឆ្នាំ ២០២០ នឹងមានការជួបគ្នានូវជំនួប 2MBET Derby គឺការតតាំងរវាងក្រុមបាល់ទាត់ Cambodians Fan Clun All Stars (CFA) នឹងត្រូវតតាំងក្រុម PEKMI FC នៅកម្មវិធី <<ប្រកួតបាល់ទាត់មិត្តភាពសប្បុរសធម៌>> ដែលមានការផ្សាយផ្ទាល់លើទំព័រ VEHA Media។
ការប្រកួតនេះធ្វើឡើងក្នុងគោលបំណងរៃអង្គាសថវិកាយកទៅជួយដល់ប្អូនស្រី សន សារ៉ាត់ ដែលកើតជំងឺមហារីកខួរឆ្អឹងគ្មានលទ្ធភាពព្យាបាលជំងឺ។
បើតាមការបញ្ជាក់លម្អិតពីអ្នកតំណាងក្រុម CFA លោក អៃ សំអូន បានសង្កត់ធ្ងន់ថា៖ “គ្រួសាររបស់កុមារីខាងលើគឺមានជីវភាពខ្វះខាតខ្លាំង ដែលម្តាយត្រឹមជាអ្នកលក់ត្រកួនរកបានថវិកាស្តួចស្តើងដើម្បីផ្គត់ផ្គង់ជីវភាពប្រចាំថ្ងៃ ហើយបច្ចុប្បន្នស្នាក់អាស្រ័យក្រោមផ្ទះលោកតា ស្ថិតនៅ ភូមិខ្សាច់ ឃុំអរិយក្សត្រ ស្រុកល្វាឯម ខេត្តកណ្ដាល”។
ប្រភពបានបង្ហើបថាបច្ចុប្បន្នមានការចូលរួមពីសំណាក់សប្បុរសជនជាបណ្តើរៗហើយ ប៉ុន្តែក្រុមនៅតែបើកទទួលការចូលរួមរបស់បងប្អូនរហូតដល់ការប្រកួតត្រូវបានបញ្ចប់។ អ្នកអាចចូលរួមឧបត្ថម្ភបានតាមរយៈតំណាងក្រុមបាល់ទាត់ CFA តាមគណនី ABA: Aiy Somoun => 001061334 និង ACLEDA ទាន់ចិត្ត => 0962260588។
បញ្ជាក់ថាជានិច្ចកាល CFA តែងតែបង្កើតនូវកម្មវិធីសប្បុរសធម៌ធំតូចជាហូរហែ ដោយកាលពីពាក់កណ្តាលខែមិថុនាកន្លងទៅ ក្រុមក៏ទើបតែបញ្ចប់ការប្រកួតសប្បុរសធម៌ជួយដល់ប្អូនស្រី ស៊ាន ស្រីនិច្ច ដែលខ្វះខាតថវិកាវះកាត់ជើង ដែលកាលនោះក្រុមរៃអង្គាសថវិកាពីសប្បុរសជនបានជាទឹកប្រាក់ ១ ៧៦៧ ដុល្លារ និង ១ ៣៥៣ ៥០០ រៀលផងដែរ៕