ទន្ទឹមនឹងកុងត្រាខ្ចីជើងរយៈពេល ៦ ខែរបស់ Zlatan Ibrahimovic នៅក្លឹប AC Milan កៀកនឹងបញ្ចប់ តាមសារព័ត៌មាន GdS បានចុះផ្សាយថាអនាគតរបស់កីឡាករស៊ុយអែតជាមួយក្លឹបអ៊ីតាលីគឺទំនងជាត្រូវចប់សព្វគ្រប់ត្រឹមរដូវកាលនេះហើយ ពោលគ្មានការបន្តកុងត្រាថ្មីទៀតឡើយ។
មូលហេតុក៏ដោយសារទំនាក់ទំនងមិនត្រូវរ៉ូវគ្នារវាងនាយកប្រតិបត្តិក្លឹប AC Milan គឺលោក Ivan Gazidis និងភ្នាក់ងាររត់ការរបស់ Zlatan គឺលោក Mino Raiola ដែលអ្នកទាំងពីរហាក់សោះកក្រោះនឹងគ្នាជាខ្លាំង រហូតដល់ថ្នាក់ Raiola ធ្លាប់ប្រកាសក្តែងៗថា AC ដើរផ្លូវខុស ហើយចង់ឲ្យមានការផ្លាស់ប្តូរអ្នកគ្រប់គ្រងក្លឹបទៀតផង។
ជាលទ្ធផលមិនត្រឹមប៉ះពាល់ដល់អនាគតរបស់ Zlatan ឡើយ ទៀតសោតទាំងអ្នកចាំទីវ័យក្មេង Gianluigi Donnarumma ដូចគ្នា គឺរំពឹងចាកចេញ ក្រោយកុងត្រាត្រូវបញ្ចប់នៅរដូវកាលក្រោយផងដែរ។ វាក៏ជាតម្រូវការចាំបាច់របស់ក្លឹប ត្បិតត្រូវជ្រើសរើសផ្លូវដើរទាំងឈឺចាប់ក្នុងការជម្រុះកីឡាករ ព្រោះដើម្បីប៉ះប៉ូវលើផ្នែកហិរញ្ញវត្ថុនៃក្លឹបទាំងមូលឲ្យមានស្ថិរភាពឡើងវិញ៕
ប្រភព៖ AF