ក្នុង​ការ​ប្រកួត​នៅ​សប្ដាហ៍​ទី ​២​ពាន​រង្វាន់ Metfone Cambodian League រដូវ​កាល​ ២០២០ ក្រុមភ្នំពេញ​ក្រោន​បាន​យក​ឈ្នះ​យុវជនបាទី​ក្នុង​លទ្ធផល​៧​ទល់​០ ខណៈ​ដែល៧​គ្រាប់នេះរក​បាន​ដោយ​កីឡាករ  Timothy Okereke ៣គ្រាប់កីឡាករ Masaaki Ideguchi, Esoh Omogba, Andres Nieto និងកីឡាករ សេត រ៉ូហ្សាក់ រក​បាន​មួយ​គ្រាប់​ម្នាក់​ៗបន្ថែម​ទៀត។

លោក ស៊ុំ វណ្ណា បាននិយាយប្រាប់ ppcfc.com ថា៖«វាជាលទ្ធផលល្អ ប៉ុន្តែវាមិនមែនជាការបង្ហាញទម្រង់លេងដែលយើងចង់ឃើញនោះទេ។ យើងដឹងមុនការប្រកួតថាយើងនឹងឈ្នះការប្រកួតនេះប៉ុន្តែការបង្ហាញ និងបច្ចេកទេសក្រុមមិនសូវល្អ នោះទេ»។

«ខ្ញុំគិតថាយើងត្រូវការកែលម្អនៅក្នុងការប្រកួតបន្ទាប់។ កីឡាករត្រូវស្វែងយល់ឱ្យកាន់តែច្បាស់ទាក់ទងនឹងស្ថានភាពជាក់ស្តែងក្នុងពេលប្រកួត តើពួកគេគួរធ្វើអ្វីនៅពេលយើងឈ្នះ ឬចាញ់»។

«យើងបានប្រឈមនឹងគូប្រកួតពីរដែលមិនប្រើកីឡាករបរទេស ដូច្នេះយើងធ្វើបានយ៉ាងល្អក្នុងការការពាររបស់យើង។ យើងនឹងដឹងកាន់តែច្បាស់ពីរបៀបការពាររបស់យើងពេលយើងជួប អាស៊ីអឺរ៉ុបយូណាយធីត»។

«ខ្ញុំគិតថាយើងមានការចាប់ផ្តើមដ៏ល្អមួយសម្រាប់រដូវកាលថ្មី ហើយយើងបានប្រឈមនឹងក្រុមដែលយើងអាចទទួលបានលទ្ធផល។ នេះអាចផ្តល់ឱ្យយើងនូវការលើកទឹកចិត្តដ៏ធំ និងជាឱកាសសម្រាប់ពួកយើងដើម្បីឈរនៅលើកំពូលតារាងលីគ។ យើងនឹងព្យាយាមរក្សាជំហរនេះ»។

«យើងត្រូវតែធ្វើឲ្យប្រសើរឡើង ហើយយើងនឹងព្យាយាមរៀបចំក្រុមដ៏ល្អមួយដើម្បីត្រៀមនឹងការប្រកួតជាមួយ អាស៊ីអឺរ៉ុបយូណាយធីត នៅក្នុងទឹកដី»។

ពេល​នេះក្រោនឈរ​កំពូល​តារាង​បណ្ដោះ​អាសន្ន ផល​សង​គ្រាប់​បាល់​ចំណេញមា​​ដល់​ទៅ​១០​គ្រាប់​​ក្រោយ​ឈ្នះ​២​ប្រកួត​ដំបូង មាន​៦​ពិន្ទុ​ស្មើ​ជាមួយព្រះខ័នរាជស្វាយរៀង​ដែល​មាន​៦​ពិន្ទុដូច​គ្នា​តែ​គ្រាប់បាល់​ចំណេញ​តិច​ជាង៕