លោក Zidane បានបញ្ជាក់ច្បាស់ហើយថាមិនទិញខ្សែប្រយុទ្ធបន្ថែមឡើយនៅខែមករាខាងមុខនេះ បើទោះជាក្រុមបច្ចុប្បន្នកំពុងជួបបញ្ហារកគ្រាប់បាល់ក៏ដោយ។
ក្រុម Real Madrid បានត្រឹមស្មើក្រុម Athletic Club ០-០ ប៉ុណ្ណោះក្នុងការប្រកួតលីគអេស្ប៉ាញនៅយប់មិញ ធ្វើឱ្យពួកគេចាញ់ពិន្ទុក្រុមកំពូលតារាង FC Barcelona ២ពិន្ទុ។ ក្រុមរបស់លោក Zidane នារដូវកាលនេះ មានបញ្ហានៅតំបន់ប្រយុទ្ធច្រើន ដោយក្រៅពី Benzema ទៅ ខ្សែប្រយុទ្ធដទៃទៀត ពិបាកក្នុងការរកគ្រាប់បាល់ណាស់។ ជាក់ស្ដែង Jovic និង Hazard ជាដើម ទើបរកបាន១គ្រាប់ប៉ុណ្ណោះនៅ La Liga រដូវកាលនេះ។
បើទោះជាយ៉ាងនេះក្ដី Zidane បានអះអាងថា៖ “យើងមានឱកាសច្រើនណាស់ ប៉ុន្តែយើងមិនអាចរកគ្រាប់បាល់បាន។ វាគ្រាន់តែសំណាងមិនមកខាងយើងប៉ុណ្ណោះ យើងនឹងបន្ដបង្កើតវាបន្ថែមទៀត។ យើងមិនអាចបោះបង់ការខិតខំរបស់យើងបានទេ ខ្ញុំជឿថាយើងនឹងកាន់តែធ្វើបានល្អបន្ថែមទៀត។ នាខែមករាខាងមុខ ខ្ញុំមិនត្រូវការខ្សែប្រយុទ្ធបន្ថែមឡើយ ខ្ញុំជឿជាក់លើសមាជិកក្រុមរបស់ខ្ញុំ”៕ប្រភព៖ Marca
