ក្លឹបបាល់ទាត់សមាជិកនៃលីគកំពូលកម្ពុជា Metfone Cambodian League វិសាខា បានប្រកាសចុះអនុសារណៈយោគយល់គ្នា( MOU) ជាមួយក្លឹបនៃក្របខណ្ឌលីគកំពូលជប៉ុន(J.League) Yokohama FC ។
សេចក្តីប្រកាសរបស់ក្លឹបវិសាខាក្នុងទំព័រហ្វេសបុករបស់ខ្លួនផ្ទាល់ ក្នុងការចុះអនុស្សារណៈយោគយល់គ្នា(MoU) ជាមួយក្លិប Yokohama FC ដែលជាក្លិបសមាជិក J1-League 2020 ដើម្បីពង្រឹងចំណងមិត្តភាពកម្ពុជា-ជប៉ុន និងពង្រីកកិច្ចសហប្រតិបត្តិការការងាររវាងក្លិបទាំងពីរ ពិសេសការផ្លាស់ប្ដូរកីឡាករយុវជនថ្នាល ក៏ដូចជាគ្រូបង្វឹក សំដៅជំរុញការអភិវឌ្ឍក្លិបទាំងពីរ ឆ្ពោះទៅរកភាពរីកចម្រើនបន្ថែមទៀត។
ពិធីចុះ MOU នេះ បានធ្វើកាលពីថ្ងៃទី១៥ ខែធ្នូ ឆ្នាំ២០១៩ ក្រោមវត្តមានឯកឧត្តម ស សុខា ស្ថាបនិកក្លិបកីឡាបាល់ទាត់វិសាខា, លោកជំទាវ កែ សួនសុភី ប្រធានក្លិបកីឡាបាល់ទាត់វិសាខា និងលោក Onodera Hiroshi ប្រធានក្លិប Yokohama FC របស់ជប៉ុន ព្រមទាំងក្រុមការងារក្លិបទាំងពីរផងដែរ នៅឯប្រទេសជប៉ុន។
គួរបញ្ចាក់ផងថា Yokohama FC ក្នុងរដូវកាល២០១៩ បានបញ្ចប់ទៅលេខរៀងទី២ នៃលីគលំដាប់ទី២ ជប៉ុន ដូច្នេះមានន័យថាក្នុងរដូវកាល២០២០ ខាងមុខនេះ ពួកគេគឺជាសាមជិកនៃលីគកំពូលជប៉ុន (J1-League 2020) ៕