ក្លឹប Napoli ទីបំផុតបានជោគជ័យលើកិច្ចព្រមព្រៀងនាំយកកីឡាករ Fernando Llorente មកចូលរួមនៅ Serie A ក្រោយពេលដែលកីឡាករសញ្ជាតិអេស្ប៉ាញបានផុតកុងត្រាជាមួយនឹងក្លឹបចាស់ Tottenham Hotspur។
ក្នុងលក្ខខណ្ឌឥតតម្លៃខ្លួន បុរសវ័យ ៣៤ ឆ្នាំ ត្រូវបានរាយការណ៍ថាព្រមព្រៀងលើកុងត្រារយៈពេល ២ ឆ្នាំជាមួយក្លឹប Napoli។ Llorente បានចាយពេល ២ រដូវកាលជាមួយមាន់ខ្នាយមាសដោយរកបាន ២ គ្រាប់នៅ PL និង ៣ គ្រាប់នៅ UCL រាប់បញ្ចូលទាំងគ្រាប់បាល់ដ៏សំខាន់ដែលរុញច្រានឲ្យ Spurs យកឈ្នះ Man City ឡើងទៅវគ្គពាក់កណ្ដាលផ្ដាច់ព្រ័ត្ររដូវកាលចាស់។
ក្លឹបរបស់លោក Carlo Ancelotti នឹងរំពឹងលើចំណែកថ្មីរូបនេះ សម្រាប់ពង្រឹងបន្ថែមទៀតនៅរដូវកាល ២០១៩/២០ បន្ទាប់ពីទើបតែបរាជ័យនៅលទ្ធផល ៤-៣ ទល់ Juventus ជាមួយគ្រាប់បាល់ Own-Goal របស់ខ្សែការពារល្អបំផុត Kalidou Koulibaly៕ ប្រភព៖ BeSoccer