តាមរយៈសេចក្តីប្រកាសចេញពីសមាគមន៍បាល់ទាត់របស់ប្រទេសថៃ (FAT) បានបង្ហាញពីការតែងតាំងតំណែងអ្នកចាត់ការពេញសិទ្ធថ្មីគឺលោក Akira Nishino សញ្ជាតិជប៉ុនសម្រាប់ក្រុមបាល់ទាត់ជម្រើសជាតិថៃ។
ក្រុមដំរីបានទំនេរតំណែងគ្រូបង្គោលចាប់តាំងពីការបណ្តេញចោលលោក Milovan Rajevac អំឡុងការប្រកួត AFC Asian Cup ២០១៩ ក្នុងប្រទេសអារ៉ាប់រួម ហើយដាក់លោក Sirisak Yodyardthai ជាគ្រូបង្វឹកបណ្តោះអាសន្ន ដែលបានដឹកនាំក្រុមតតាំងនៅ Asian Cup, China Cup ២០១៩ និង King’s Cup ២០១៩ នាពេលកន្លងទៅនេះ។
យ៉ាងណាមិញលោក Nishino ដែលបានដឹកនាំក្រុមជប៉ុននៅ FIFA World Cup ២០១៨ ពេលនេះត្រូវសម្រេចចូលមកកាន់តំណែង ជួយក្រុមថៃដែលកំពុងមមាញឹកនៅព្រឹត្តិការណ៍ជម្រុះ FIFA World Cup ២០២២ និង AFC Asian Cup Joint-Qualifiers ២០២៣ ត្រូវប្រព្រឹត្តិឡើងនាខែកញ្ញា ឆ្នាំ ២០១៩។
រំឭកថាអតីតគ្រូចាស់នៅ Vissel Kobe រូបនេះ ក៏នឹងដឹកនាំលើក្រុម U-23 របស់ថៃដូចគ្នា ខណៈលោក Alexandre Garma ដែលកាន់តំណែងចាស់ ទើបផ្លាស់ទៅកាន់កាប់នៅក្លឹប Muangthong United នៃក្របខ័ណ្ឌកំពូល។ ប្រភព៖ FoxSportAsia