Xavi បានបញ្ជាក់កាលពីដើមឆ្នាំនេះថា គាត់នឹងចាកចេញពីដំណែងក្រោយចប់រដូវកាលនេះ ហើយចំពេលមានការអំពាវនាវជាច្រើនឱ្យគាត់ដឹកនាំបន្ត ក្រោយឃើញទម្រង់លេងដ៏គួរអោយចាប់អារម្មណ៍ ថ្មីៗនេះគាត់បានសង្កត់ធ្ងន់ថាគាត់នឹងមិនផ្លាស់ប្តូរចិត្តរបស់គាត់ទេ។

យោងតាមសារព័ត៌មានបានឱ្យដឹងថា Barcelona លែងស្វែងរកអ្នកជំនួស Xavi ហើយបានសម្រេចចិត្តថា ប្រសិនបើពួកគេមិនអាចបញ្ចុះបញ្ចូល Xavi ឱ្យបន្ត ពួកគេនឹងងាកទៅរក Marquez។

អតីតកីឡាករជម្រើសជាតិម៉ិកស៊ិកដែលបានចំណាយពេល ៧ឆ្នាំជាកីឡាករនៅ Camp Nou ចន្លោះឆ្នាំ ២០០៣​ ដល់ ២០១០ បានគ្រប់គ្រងក្លឹប Barca Atletic ហើយរបាយការណ៍បានអះអាងថាឥឡូវនេះគាត់គឺជាបេក្ខជនតែមួយគត់ដែលកំពុងពិចារណាដើម្បីជំនួស Xavi។

Barcelona បានស្វែងរកអ្នកជំនួស Xavi អស់រយៈពេលជាយូរមកហើយ ប៉ុន្តែឥឡូវនេះបានច្រានចោលការផ្ទេរអ្នកចាត់ការទាំងនោះ ដែលមានដូចជា Ruben Amorim របស់ Sporting CP ឬ Roberto De Zerbi របស់ Brighton។អតីតអ្នកចាត់ការទូទៅរបស់អាល្លឺម៉ង់ Hansi Flick ត្រូវបានគេមើលឃើញថាជាបេក្ខជនខាងក្រៅដែលអាចមានលទ្ធភាពតែមួយគត់ ខណៈដែលគាត់អាចនាំយកមកបានដោយគ្មានតម្លៃខ្លួន ប៉ុន្តែការព្រួយបារម្ភអំពីកង្វះបទពិសោធន៍របស់គាត់នៅក្នុងប្រទេសអេស្ប៉ាញ និងការទាមទារប្រាក់បៀវត្សរ៍ខ្ពស់បានធ្វើឱ្យមន្ត្រីក្លឹបនិយាយយ៉ាងច្បាស់អំពីភាពមិនអាចទៅរួចក្នុងការចុះហត្ថលេខា Flick។

ជាលទ្ធផល ឥឡូវនេះការផ្តោតអារម្មណ៍របស់ក្លឹបគឺទៅលើ Marquez តែម្នាក់គត់។ Marquez នឹងត្រូវបានតែងតាំងជាគ្រូបង្វឹកក្រុមដំបូង លុះត្រាតែប្រធាន Joan Laporta បរាជ័យក្នុងការបញ្ចុះបញ្ចូល Xavi ឱ្យបន្ត។ គាត់សង្ឃឹមថានឹងរក្សា Xavi ហើយនឹងចំណាយពេលពីរបីសប្តាហ៍ខាងមុខដើម្បីព្យាយាមឈានដល់ដំណោះស្រាយវិជ្ជមានជាមួយអ្នកចាត់ការបច្ចុប្បន្ន មុនពេលប្តូរការយកចិត្តទុកដាក់របស់គាត់ទៅ Marquez៕