ធ្លាប់តែសរសើរពេញៗមាត់ ដល់បត់មកក្នុងសប្តាហ៍នេះ បែរផ្ទុះតែពាក្យរិះគន់ ក្រោយកីឡាករមានឈ្មោះល្បីទាំង ៤ ហាក់ធ្លាក់ទម្រង់ផ្ទួនគ្នា ដល់ខ្លះក៏ទទួលរងបរាជ័យនាំឲ្យរបូតពានរង្វាន់ថែមទៀតផង។ ទាំងអតីត ទាំងអនាគតស្តេចបាល់ទាត់ដែលមនុស្សជាច្រើនកំពុងផ្ទុះការវែកញែក បានជួបលទ្ធផលមិនល្អក្នុងការប្រកួតដូចៗគ្នានៅរយៈពេលប៉ុន្មានថ្ងៃចុងក្រោយ៖
៤) Cristiano Ronaldo
យើងសារថយក្រោយទៅវេលាទៀបភ្លឺ ឈានចូលថ្ងៃទី ០៩ មេសាទើបតែបញ្ចប់ថ្មីថ្មោងក្នុងការប្រកួតវគ្គពាក់កណ្ដាលផ្ដាច់ព្រ័ត្រពានរង្វាន់ Saudi Super Cup ដែល Al-Hilal បានបំបាក់ក្លឹប Al-Nassr ដោយលទ្ធផល ២-១។ ខាងក្លឹបដឹកនាំដោយលោក Luis Castro បានបាត់បង់ឱកាសឆ្ពោះទៅកាន់វគ្គផ្តាច់ព្រ័ត្រ ដូចគ្នាសម្រាប់ CR7 ក៏របូតឱកាសអាចលើកពាន Saudi Super Cup ជាលើកដំបូងផងដែរ។
មិនត្រឹមតែប៉ុណ្ណោះទេ បុរសវ័យ ៣៩ ឆ្នាំ ដែលកើតកាយវិការខឹងសម្បាទៅលើគូប្រជែង ជាមួយការលើកកែងកំឡុងចុងការប្រកួត ក៏ត្រូវអាជ្ញាកណ្តាលលើកពិន័យកាតក្រហមថែមទៀត។ នេះកីឡាករព័រទុយហ្គាល់ប្រឈមនឹងត្រូវព្យួរឈ្មោះនា ២ ប្រកួតបន្ទាប់។ បញ្ជាក់ជុំវិញកាលបរិច្ឆេទវគ្គផ្តាច់ព្រ័ត្រពានខាងលើ គឺនឹងចូលមកដល់នៅវេលាយប់នេះ ម៉ោង ០០:៣០ នាទីរំលងអាធ្រាត្រ រវាង Al-Ittihad ទល់ Al-Hilal ក៏នឹងមានផ្សាយបន្តផ្ទាល់លើទំព័រ CTS SPORTS។
៣) Lionel Messi
ងាកមកម្ចាស់អាវលេខ ១០ ឯណេះវិញ ក៏មានរឿងត្រូវនិយាយទាំងព្រឹក បន្ទាប់ Inter Miami មិនអាចឆ្លងផុតក្រោមថ្វីជើងក្លឹបម៉ិកស៊ីកូ Monterrey នៅវគ្គ ៨ ក្រុមចុងក្រោយពានរង្វាន់ប្រចាំទ្វីប Concacaf Champions Cup។ ការឈរជើងពេញតង់របស់ Messi សម្រាប់លោក មិនអាចរកបានគ្រាប់បាល់អ្វីនោះទេ ពោលបញ្ចប់លទ្ធផលក្រុមបរាជ័យ ១-៣ ខណៈសរុបទាំងពីរជើងគឺ ២-៥។ ម្ល៉េះឱកាសកាន់ពាន ៣ នារដូវកាលទោល សេសសល់ត្រឹម ២ ប៉ុណ្ណោះ គឺ MLS និង Leagues Cup។
២) Kylian Mbappe
អនាគតចំណូលថ្មីរបស់ Real Madrid សម្រាប់ការបើកទ្វារកីឡដ្ឋាន Parc de Princes ស្វាគមន៍ក្លឹបយក្សអេស្ប៉ាញ Barcelona យប់មិញ ឃើញថាកូនអណ្តើកល្បឿនលឿន Mbappe ហាក់ធ្វើមិនបានល្អដូចការចង់បានទាល់តែសោះ។ ពេលវេលាឈរជើងរបស់គេពេញ ៩០ នាទីនៅតំបន់ស្លាប ក្រោមការបង្គាប់ពីអ្នកចាត់ការ Luis Enrique ហាក់ពិបាកនឹងចូលចុះកីឡាករក្មេងៗ ជាពិសេសដូចការពារក្រោមវ័យទើប ១៧ ឆ្នាំ Pau Cubarsi ដែលក្មេងតូចម្នាក់នេះ កាលប៉ះ Napoli ក៏តាមបិទ Victor Osimhen បានល្អ ឥឡូវមកប៉ះ PSG តាមកៀក Mbappe ជាប់ស្អិតដូចតុកកែ។
ចប់ការប្រកួត Mbappe ដែលមិនអាចរកបានគ្រាប់បាល់និង Assist ទទួលបានត្រឹម ៦,៦ ពិន្ទុ ជាការវាយតម្លៃនៅកម្រិតទាប បើធៀបនឹងកីឡាករវ័យក្មេងល្អៗឯទៀតរបស់អ្នកមានបុណ្យ ដូច Pedri ដូច និង Lamine Yamal ជាដើម។
១) Erling Haaland
ទទួលស្គាល់ថារដូវកាលនេះល្អ តែប្រកួតសំខាន់ទល់ Real Madrid កាលពីថ្ងៃកន្លងទៅ មនុស្សយន្តHaaland ហាក់ជាប់គាំងម៉ាស៊ីន ចង់រំដោះខ្លួនទៅខាងណាក៏ពិបាក ព្រោះជញ្ជាំងយក្សរបស់ស្តេចសម្នាក់ៗគឺមាំខ្លាំង តាមបិទតាមកៀកជាប់គ្រប់ជ្រុង។
នៅប្រកួតស្មើ ៣-៣ នោះ យុវជនន័រវេសដែលគេសរសើរថាប្រុងក្លាយជាអនាគតអ្នកស្នងតំណែងស្តេចបាល់ទាត់ទាំងពីរខាងលើ ត្រូវបាន Antonio Rudiger ចាក់សោជាប់ នេះគេប៉ះបាល់បាន ២០ លើកត្រឹម ហើយស៊ុត ១ ជើង ចូលទី ០៕
ប្រភព៖ បរទេស