ការប្រកួតវគ្គ ១៦ក្រុមចុងក្រោយនៃក្របខ័ណ្ឌ Champions League រវាង Barcelona និង Napoli នឹងឈានទៅជើងទីពីរនៅថ្ងៃអង្គារនៅឯកីឡដ្ឋាន Estadi Olimpic Lluis Companys។ ការប្រកួតជើងទីមួយក្នុងទីក្រុង Naples បានបញ្ចប់ក្នុងលទ្ធផលស្មើ ១-១ ដែលជាលទ្ធផលដែលពិតជាសាកសមនឹងក្រុមម្ចាស់ជើងឯកអ៊ីតាលីដែលកំពុងឡើងជើង។វាពិបាកក្នុងសន្និដ្ឋានថាក្រុមណាទំនងជាឈានទៅវគ្គ ៨ក្រុមចុងក្រោយ។ Barcelona ស្ថិតក្នុងទម្រង់លេងដ៏ល្អ បើទោះបីជាពួកគេគ្មាន Gavi, Pedri និង Frenkie de Jong ក៏ដោយ។ Napoli ក៏កាន់តែឡើងជើងក្នុងប៉ុន្មានសប្តាហ៍ថ្មីៗនេះផងដែរ។
Barcelona ពិតជាមានប្រៀបក្នុងផ្ទះ បើទោះបីជាវាមិនមែននៅកីឡដ្ឋាន Spotify Camp Nou ក៏ដោយ។ អតីតតារាឆ្នើមរបស់ Napoli កីឡាករ Kalidou Koulibaly ជឿជាក់ថា Napoli មានប្រៀបជាងក្នុងការឡើងទៅវគ្គបន្ត។ Koulibaly បានប្រាប់ La Gazzetta dello Sport ថា៖
“Napoli មានអ្វីៗគ្រប់យ៉ាងដើម្បីឡើងទៅវគ្គបន្ត។ ការដែលមិនលេងនៅ Camp Nou អាចជារឿងចំណេញមួយសម្រាប់ Napoli។ ខ្ញុំសង្ឃឹមថា Napoli ឡើងទៅវគ្គបន្តទៀត។ Barcelona មានកីឡាករដែលមានទេពកោសល្យ និងជាគ្រូបង្វឹកដ៏អស្ចារ្យ ប៉ុន្តែ Napoli ត្រូវបានរៀបចំឡើងវិញ ហើយពួកគេអាចធ្វើឲ្យ Barcelona ឈឺចាប់”៕