បើជាអ្នកនិយមគាំទ្រនិងទស្សនាបាល់ទាត់ ប្រាកដធ្លាប់បានឃើញធ្លាប់បានលឺនូវអត្តចរិតមួយចំនួនរបស់ Cristiano Ronaldo ក៏ដូចជាកាយវិការគួរឲ្យគោរព ទទួលស្គាល់ពីមិត្តរួមក្លឹប និងអ្នកចាត់ការកំពូលៗក្នុងលោក។ ងាកមក Angel di Maria ដែលធ្លាប់ជាអតីតមិត្តរួមទ្រនំមួយរូបកាលនៅអធិរាជស Real Madrid ក៏បាននិយាយពាក់ព័ន្ធនឹង CR7 ផងដែរ តែបង្ហើបដល់ចំណុចចាក់ដោត សាមីខ្លួនកីឡាករព័រទុយហ្គាល់ផ្ទាល់ រាងដើររំលងនឹងច្បាប់វិន័យរបស់ខ្លួន។
យើងបញ្ជាក់ឲ្យបងប្អូនបានដឹងបន្តិច កីឡាករអាហ្សង់ទីន Di Maria គេបានជ្រើសការផ្ទេរចេញពី Benfica មកកាន់ក្លឹបក្នុងទីក្រុង Madrid នៅតម្លៃ ៣៣,៥ លានអឺរ៉ូ កាលឆ្នាំ ២០១០។ វាជាសម័យកាលគេចូលរួមជាមួយ Superstar ប្រចាំក្លឹប មាន Karim Benzema, Iker Casillas, Kaka និង Ronaldo ជាដើម។ នៅ ១៩០ ប្រកួត គេរកបាន ៣៦ គ្រាប់ ក៏ Assist ៨៥ លើក មុនបន្តដំណើរទៅក្លឹបក្នុងទីក្រុង Manchester ក្រហមនាឆ្នាំ ២០១៤។
បកទៅបទសម្ភាសន៍ចាស់ ប្រាប់ Libero កាលឆ្នាំ ២០២១ Di Maria បានបង្ហាញអារម្មណ៍ភ្ញាក់ផ្អើល ជុំវិញភាពចេះដាក់ខ្លួន មិនក្រអឺតក្រទមរបស់ស្តេចបាល់ទាត់ព័រទុយហ្គាល់ នៅថ្ងៃកម្មពិធីខួបកំណើតជាមួយនឹងមិត្តភ័ក្ដិឯទៀត។
ប្រយុទ្ធស្លាបកម្ពស់ ១,៧៨ ម៉ែត្រ រៀបរាប់ថា៖ “ខ្ញុំបានអញ្ជើញ Cristiano មកចូលរួមកម្មពិធីខួបកំណើតរបស់ខ្ញុំធ្វើឡើងនៅទីក្រុង Madrid ជាលើកដំបូង ហើយដើមឡើយខ្ញុំគិតថា គាត់នឹងមិនមកទេ ដល់តែហើយគាត់បែរជាមក គាត់ធ្វើខ្លួនសាមញ្ញ មកអង្គុយទទួលទានស្រាបៀជាមួយមិត្តភក្តិរបស់ខ្ញុំឯទៀតដូចមនុស្សម្នាទូទៅ”។
នេះបានន័យថា CR7 លោកបានរំលងច្បាប់វិន័យខ្លួនឯងក្នុងការទទួលទានគ្រឿងស្រវឹងមួយសារហើយ ដើម្បីតែអបអរថ្ងៃពិសេសរបស់កីឡាករអាហ្សង់ទីន Di Maria។ តែវាមិនមែនជាលើកដំបូងឡើយ ត្រង់កាលឆ្នាំ ២០១៦ ក៏ម៉ាស៊ីនស៊ុតព័រទុយហ្គាល់ ធ្លាប់បានបំពាននឹងខ្លួនឯងមុននោះម្តងដែរ គ្រាជម្រើសជាតិលើកពានប្រចាំទ្វីបអឺរ៉ុប UEFA European Championship ២០១៦។
នៅបទសម្ភាសន៍ជាមួយអ្នករាយការណ៍សម្រស់បាន Diletta Leotta កាលឆ្នាំ ២០១៩៖ “នាមជើងឯកអឺរ៉ុបជាមួយព័រទុយហ្គាល់ វាជាពានរង្វាន់ដ៏ធំធេងបំផុតខ្ញុំអត់ធ្លាប់បានឈ្នះ វាអស្ចារ្យណាស់ វាជារាត្រីដែលមិនអាចបំភ្លេច ខ្ញុំយំផង សើចផង ឈឺចាប់ផង ស្រែកផង ហើយក៏ស្រវឹងដែរពេលនោះ”។
“កំឡុងការប្រកួតខ្ញុំយំដល់អស់ជាតិទឹកពីខ្លួន រួចនៅទីបញ្ចប់កំឡុងពេលអបអរ ខ្ញុំទទួលទានស្រាអស់មួយកែវ ខ្ញុំអត់ដែលផឹកពីមុនមកទេ តែដោយសារវាជាថ្ងៃពិសេស ជាពានរង្វាន់ដ៏សំខាន់បំផុតក្នុងអាជីព”។
រំឭកថា មកទល់សព្វថ្ងៃបុរសវ័យ ៣៩ ឆ្នាំ ក៏នៅតែបន្តឈរជើងឲ្យជម្រើសជាតិខាងលើដដែល ហើយក៏ត្រៀមនឹងទទួលកាតព្វកិច្ចនៅ International Break បន្ត នាថ្ងៃទី ២២ និង ២៧ មិនាខាងមុខ ទល់ស៊ុយអែត និងស្លូវ៉ានី ជាប្រកួតមិត្តភាព មុនឆ្លងដល់ប្រកួតសំខាន់ពាក់កណ្តាលឆ្នាំ EURO 2024៕
ប្រភព៖ បរទេស