ការផ្លាស់ប្តូរមកកាន់ទ្រនំថ្មី ជាពិសេសនៅក្រៅដីកំណើត ឬកន្លែងដែលយើងមិនធ្លាប់រស់នៅ វាហៅបានជាការបត់ចូលនូវបរិបទថ្មីសន្លាងដ៏ធំមួយ ដោយកីឡាករខ្លះក៏អាចសម្របខ្លួនឆាប់រហ័ស ខ្លះទៅក៏ទាមទារពេលវេលារយៈពេលយូរ ទម្រាំអាចឈានដល់ចំណុចដែលពួកគេចង់បាន។
ដោយឡែកងាកទៅក្របខ័ណ្ឌកំពូល Premier League មួយឆ្នាំៗតែងមានកីឡាករបរទេស ផ្ទេរចេញពីប្រទេសដទៃ មកកាន់ទឹកដីអង់គ្លេសមិនចេះតិចឡើយ ហើយ ២០២៣/២៤ គ្រប់គ្នាប្រាកដបានដាក់ការចាប់អារម្មណ៍ខ្ពស់ទៅលើខ្សែប្រយុទ្ធវ័យក្មេងសញ្ជាតិដាណឺម៉ាក Rasmus Hojlund។
ការបត់ខ្លួនចេញពីទ្រនំចាស់អ៊ីតាលី Atalanta មកកាន់ទ្រនំថ្មីអង់គ្លេស Man Utd ក្នុងតម្លៃផ្ទេរ ៧៣,៩០លានអឺរ៉ូ វាពិតជាចំណុចរសើប ដាស់ក្រសែភ្នែកអ្នករាល់គ្នាឲ្យសម្លឹងមើល ចង់ដឹងចង់លឺតើចំណូលថ្មី វ័យ ២១ ឆ្នាំ អាចវិវត្តខ្លួនខ្ពស់ដល់កម្រិតណា ឬអាចនាំមុខកំណត់ត្រារៀមច្បងមួយចំនួនឬអត់?
CTS SPORTS បង្ហាញឈ្មោះកីឡាករបរទេសទាំង ៨ រូប ដែលផ្ទេរមក Premier League ហើយអាចរកបានគ្រាប់បាល់ច្រើនបំផុតនៅរដូវកាលទោលដំបូងរបស់ពួកគេ៖
៨) Son Heung-min
ចូលរដូវកាល ២០១៥/១៦ កីឡាករកូរ៉េខាងត្បូង បានវិវត្តខ្លួនចេញពី Bayer Leverkusen មកកាន់ Tottenham Hotspur។ គ្រានោះគេឈរជើងសរុប ២៨ ប្រកួត អាចរកបាន ៤ គ្រាប់ ហើយមកទល់សព្វថ្ងៃមាន ១១៥ គ្រាប់ក្នុងអាជីព Premier League។
៧) Robin van Persie
នៅរដូវក្តៅ ឆ្នាំ ២០០៤ កីឡាករហូឡង់បានចាកចេញពីក្លឹបកំណើត Feyenoord ឆ្ពោះមកក្លឹបកំពូលអង់គ្លេស Arsenal ហើយពេលវេលាដំបូងនោះ គេបង្ហាញខ្លួន ២៦ ប្រកួត ក៏រកបាន ៥ គ្រាប់ និងមុនការចាកចេញទៅវិញ បិទបញ្ជីគ្រាប់បាល់ទី ១៤៤។
៦) Nicolas Anelka
ចេញពីដីកំណើតបារាំង PSG ផ្ទេរមកកាន់កាំភ្លើងធំ Arsenal ក៏រាប់ជា Legend មួយរូបដែរ សរុបគ្រាប់បាល់ Premier League មាន ១២៥ លើក។ នេះហៅថាល្អគួរសម ត្រង់ ២៦ ប្រកួតរដូវកាលដំបូង ១៩៩៧/៩៨ គេក៏អាចរកបាន ៦ គ្រាប់។
៥) Rasmus Hojlund
ជាអ្វីដែលយើងកំពុងផ្តោត ហើយសំណាក់កីឡាករផ្ទាល់ក៏កំពុងដាក់គោលដៅរុញតួលេខគ្រាប់បាល់ឲ្យកាន់តែខ្ពស់ជាងនេះបន្ថែម។ ៧ គ្រាប់ នៅ ២០ ប្រកួត សេសសល់ឱកាសជាង ១០ ប្រកួតទៀតក្នុងដៃ ចាំមើល Hojlund អាចបន្ថែមតួលេខច្រើនប៉ុណ្ណា ក្នុងរដូវកាល ២០២៣/២៤។
៤) Sadio Mane
បញ្ជាក់ម្តងទៀត យើងរាប់តែកីឡាករបរទេសផ្ទេរចេញពីប្រទេសដទៃ មកកាន់ដីអង់គ្លេស តែបើឆ្លងពីក្លឹបមួយទៅក្លឹបមួយនៅដីអង់គ្លេសដដែល គឺយើងឥតរាប់ចូលឡើយ។ ករណី Mane ពេលគេចេញពី RB Salzburg នៅអូទ្រីស មកកាន់ Southampton នៅរដូវកាល ២០១៤/១៥ គេអាចរកបានដល់ទៅ ១០ គ្រាប់ ក្នុងការបង្ហាញខ្លួន ៣០ ប្រកួត។
៣) Jimmy Floyd Hasselbaink
ងាកមកអតីតជើងចាស់ហូឡង់រូបនេះវិញ បន្ទាប់ការផ្ទេរចេញរបស់គេពីក្លឹប Boavista នៅឯប្រទេសព័រទុយហ្គាល់ មកកាន់ Leeds United នៅដីអង់គ្លេស ចំពោះស្ថិតិរដូវកាលដំបូង ១៩៩៧/៩៨ ក៏ធ្វើបានល្អខ្លាំង ដល់ទៅ ១៦ គ្រាប់ នៅ ៣៣ ប្រកួត។
២) Thierry Henry
ឃើញថាកីឡាករ Arsenal មានដល់ទៅ ៣ រូបក្នុងបញ្ជីអ្នកទាំង ៨ ហើយអ្នកនាំមុខគេបង្អស់ ជាអតីតវីរបុរសបារាំង Henry។ នៅរដូវកាល ១៩៩៩/២០០០ គេចាកចេញពី Juventus មកកាន់ក្លឹបក្នុងទីក្រុងឡុង ហើយបង្កើតភាពភ្ញាក់ផ្អើលភ្លែត តាមរយៈការរកបាន ១៧ គ្រាប់ នៅ ៣១ ប្រកួតសម័យកាលដំបូង។
១) Sergio Aguero
កំពុងរង់ចាំមើលអ្នកបំបែក ហើយមិនទាន់ឃើញសោះ នេះកីឡាករអាហ្សង់ទីនបានគ្រងកំណត់ត្រាគ្រាប់បាល់ច្រើនបំផុតរដូវកាលទោល រាប់តែកីឡាករបរទេស មិនរាប់កីឡាករមានដើមកំណើតនៅចក្រភពអង់គ្លេស ត្រង់រដូវកាល ២០១១/១២ គេរកបាន ២៣ គ្រាប់ នៅ ៣៤ ប្រកួត។
ស្តាប់ចប់ប្រិយមិត្តប្រហែលជាឆ្ងល់ អុញចុះម៉េចអត់លើកឈ្មោះ Erling Haaland មកនិយាយផង ត្រង់រដូវកាលដំបូង ២០២២/២៣ ពេលផ្ទេរពី Dortmund មក Man City គេធ្វើបានដល់ ៣៦ គ្រាប់ នៅ Premier League។ ក៏ព្រោះតែ Haaland គេជាកីឡាករមានដើមកំណើតនៅទីក្រុង Leeds ចក្រភពអង់គ្លេស មុនទទួលបានសញ្ជាតិន័រវេសតពីឪពុក៕
ប្រភព៖ បរទេស