កាលពីប្រកួតយកឈ្នះរបស់ Real Madrid ២-០ ទៅលើ Getafe បានកើតមានការប៉ះទង្គិចពាក្យសម្តី ផ្តើមចេញពីសំណាក់សមាជិកក្លឹបអធិរាជស គឺ Jude Bellingham ទៅលើកីឡាករគូប្រជែងរួមសញ្ជាតិអង់គ្លេសតែមួយ Mason Greenwood ហើយមកទល់សព្វថ្ងៃរយៈពេលជិតមួយខែពេញ បែរមិនទាន់បិទបញ្ចប់ការស៊ើបអង្កេតនៅឡើយ។
សារថយក្រោយទៅពេលវេលានោះ គេចាប់បាន Bellingham បាននិយាយពាក្យប្រមាថទៅលើ Greenwood ថាជា ជនរំលោ.ភ។ ចប់ការប្រកួតតាមរយៈការផ្ទៀងផ្ទាត់ពីអ្នកជំនាញអានបបូរមាត់ គឺសន្មតថា ៩៧ ភាគរយ វាជាពាក្យពិត ដែលបានពោលចេញពីមាត់សិស្សប្អូនវ័យ ២០ ឆ្នាំ ទៅលើរៀមច្បងវ័យ ២២ ឆ្នាំពិតមែន។
សំណាក់ក្លឹប Getafe បានបើកការតវ៉ា និងប្រកាសឲ្យសហព័ន្ធបាល់ទាត់អេស្ប៉ាញ ដែលជាអ្នកទទួលបន្ទុកខុសត្រូវ ប្រញាប់បើកការស៊ើបអង្កេត ពិនិត្យឲ្យបានល្អិតល្អន់ជាទីបំផុត ឈរលើគោលជំហរ អ្នកខុសគឺត្រូវតែទទួលពិន័យទៅតាមច្បាប់ ហើយអ្នកត្រូវ សក្ដិសមនឹងទទួលបានភាពយុត្តិធម៌ ទើបវាសបង្ហាញពីតុល្យភាពនៃផ្នែកច្បាប់ក្នុងពិភពបាល់ទាត់។
តាមរបាយការណ៍ចុងក្រោយបង្អស់ Bellingham ប្រសិនរកឃើញថា មានកំហុសដូចការចោទប្រកាន់ពីសំណាក់ក្លឹប Getafe មែននោះ គេនឹងត្រូវបានសហព័ន្ធបាល់ទាត់អេស្ប៉ាញហៅកាត់ RFEF ដាក់ពិន័យព្យួរឈ្មោះដល់ទៅ ១០ ប្រកួតពីក្របខ័ណ្ឌ La Liga មានន័យថា ត្រូវអវត្តមានដល់កៀកនឹងបិទរដូវកាលពីរជុំចុងក្រោយ។
ដល់តែឥឡូវងាកមកការអាប់ដែតព័ត៌មានថ្មីបង្អស់ ពី TheSun បានសង្កត់ធ្ងន់ ខ្សែប្រយុទ្ធស្ថិតក្រោមការគ្រប់គ្រងរបស់ក្លឹបអាណាព្យាបាល Man United ហាក់មិនចង់យកទោសពៃរ៍អ្វីទាំងអស់ពីជនរួមជាតិតែមួយ បើទោះបីមានការអាក់អន់ចិត្ត ប៉ះពាល់ផ្លូវអារម្មណ៍កម្រិតណាក៏ដោយ ក៏បានទទូចទៅភាគីក្លឹប Getafe សុំឲ្យដកចោលការចោទប្រកាន់នោះវិញ។
ប្រភពរៀបរាប់៖ “Mason បានប្រាប់ទៅថ្នាក់លើក្លឹប ថាគេមិនចង់ឲ្យ Jude [Bellingham] រងការពិន័យអ្វីទាំងអស់ ម្ល៉េះសុំដកចោលការចោទនោះវិញ គេអត់ចង់ឲ្យប៉ះពាល់កិត្តិយសជាសាធារណៈចំពោះខាងណាទេ ជារួមត្រឹមតែចង់លេងបាល់ទាត់មួយប៉ុណ្ណោះឯង”។
“Greenwood តាមពិតទៅគេពិបាកចិត្តណាស់ពេលនេះ ត្រង់គេ មិនធ្លាប់គិតទេ ថាអាចលឺពាក្យអស់ហ្នឹងចេញពី Jude តែក៏ដឹងមុនបាត់ទៅហើយ ថាគេគឺជាគោលដៅ ងាយនឹងរងពាក្យពេចន៍អស់នោះនៅថ្ងៃណាមួយ ដូច្នេះក៏មានតែទទួលយក ស្ម័គ្រធ្វើមុខក្រាស់ដើរទៅមុខបន្ត”។
ជុំវិញរឿងរ៉ាវនេះ យើងក៏នឹងរង់ចាំមើលចំណាត់ការបញ្ចប់នៅពេលដ៏ខ្លីខាងមុខ តែបច្ចុប្បន្នភាពការបញ្ចេញមតិលើបណ្តាញសង្គម មនុស្សជាច្រើនបានសាទរចំពោះចេតនាល្អរបស់ Greenwood ជាបណ្តើរៗហើយ រួចក៏ទទូចទៅ Bellingham ថាថ្ងៃមុខ ឲ្យចេះមានការប្រុងប្រយ័ត្ន និងមានភាពចាស់ទុំជាងនេះ ប្រសិនចង់ក្លាយជាកីឡាករលំដាប់កំពូលមួយរូបក្នុងលោក៕
ប្រភព៖ បរទេស