មួយរយៈក្រោយមានការខ្វែងគំនិត ខ្វែងការយល់ឃើញមួយចំនួន មិនថាតែអ្នកគាំទ្រ និងសូម្បីតែលំដាប់កីឡាករអាជីពដូចគ្នានោះ ក៏រមែងលើកពាក់ព័ន្ធរឿងរ៉ាវនៅក្របខ័ណ្ឌអារ៉ាប៊ីសាអូឌីតមកនិយាយផងដែរ។ ជាពិសេសក្រោយលំដាប់ Superstar ជាច្រើន ជ្រើសការផ្ទេរទៅចុះចូលនៅបណ្តាក្លឹបក្នុងប៉ែកមជ្ឈិមបូព៌ា ខណៈអ្នកផ្តើមធំបង្អស់គឺ Cristiano Ronaldo។
ងាកទៅកីឡាករចាស់វស្សា សញ្ជាតិព័រទុយហ្គាល់ ធ្លាប់បានលើកឡើងកាលពីខែមករា៖ “ខ្ញុំគិតថា ពេលឥឡូវនេះ Saudi Pro League គឺកំពុងនាំមុខលីគកំពូលបារាំងហើយ”។ រំលងតែប៉ុន្មានថ្ងៃក៏មាន Neymar Jr លើកឡើងពាក់ព័ន្ធការប្រៀបធៀបនេះដែរ តែគំនិតរបស់លោក ហាក់ ៥០-៥០ មិនសរសើរខាងណាល្អដាច់គេឡើយ។
ឥឡូវងាកមកអតីតម្ចាស់អាវលេខ ៧ នៅ Real Madrid គឺ Eden Hazard ឯណេះវិញ បានជជែកឆ្លើយឆ្លងសំណួរគួរឲ្យចាប់អារម្មណ៍ជាច្រើន ក្នុងបទសម្ភាសន៍កម្មវិធី ‘The Obi One Podcast’ ហើយចម្លើយរបស់គេ បានបដិសេធ មិនឯកភាពការយល់ឃើញរបស់ Ronaldo ជាដាច់ខាត ផ្ទុយទៅវិញ ថាបើក្លឹបនៅ Ligue 1 មកតតាំងក្លឹបនៅ SPL ប្រាកដណាស់ខាងប៉ែកអឺរ៉ុប គឺជាអ្នកឈ្នះ។
លោកពន្យល់៖ “តាមពិតទៅក្លឹបនៅទីក្រុងប៉ារីស ក៏ព្យាយាមចង់ចុះហត្ថលេខាយកខ្ញុំទៅចូលរួមដែរ សឹងតែរៀងរាល់រដូវក្តៅ ពេលខ្ញុំលេងនៅ Chelsea នេះខ្ញុំមិនឯកភាពនឹងគំនិត Ronaldo ទេ តែបញ្ជាក់មុនវាត្រឹមជាយោបល់របស់ខ្ញុំ ត្រង់ពេលវេលាឥឡូវនេះ យើងទទួលស្គាល់ថាលីគអារ៉ាប៊ីសាអូឌីតមានកីឡាករធំៗជាច្រើន តែមិនមែនជាក្លឹបធំៗឡើយ ត្រូវដឹង”។
លោកបន្តថា៖ “ខុសពីនៅលីគបារាំង ពួកគេអាចថាមិនសូវមានកីឡាករកំពូល ក៏ប៉ុន្តែពួកគេលេងជាក្រុមបានល្អណាស់ ខ្ញុំនៅតែហ៊ានអះអាងជាក់ច្បាស់ បើក្លឹបនៅ Ligue 1 មកលេងទល់ក្លឹបនៅអារ៉ាប៊ីសាអូឌីត គឺខាងក្លឹបបារាំងជាអ្នកឈ្នះ ដូច្នេះប្រហែលវាមិនងាយដូចអ្វីអ្នករាល់គ្នាគិតទេ ពួកគេមានកីឡាករវ័យក្មេង ពោរពេញទៅដោយទេពកោសល្យ”។
ចុងក្រោយពាក់ព័ន្ធនឹងការជ្រើសយករវាង Cristiano Ronaldo ឬ Lionel Messi សម្រាប់អតីតខ្សែប្រយុទ្ធបែលហ្សិកក៏មានចម្លើយឲ្យដែរ មានមួយល្អជាងមួយ តែមិនមែនជា GOAT ក្នុងដួងចិត្តនោះទេ។ កីឡាករធ្លាប់ឈរជើងនៅក្របខ័ណ្ឌ Premier League៖ “Cristiano Ronaldo ជាអ្នកបញ្ចប់ល្អបំផុតក្នុងប្រវត្តិសាស្រ្តបាល់ទាត់ គេនឹងនាំពានរង្វាន់មកកាន់អ្នក គេរកបានគ្រាប់បាល់ ទោះចូលដល់អាយុ ៥០ ឆ្នាំ តែខ្ញុំជ្រើសយក Messi ព្រោះចូលចិត្តរបៀបលេងរបស់គាត់ជាង តែយ៉ាងណាបើនិយាយអំពីកីឡាករល្អបំផុតគ្រប់ពេលវេលាក្នុងប្រវត្តិសាស្រ្តមួយនេះ គឺខ្ញុំរើសយក Zidane”។
គួរឲ្យដឹងថា អតីតយុវជនថ្នាលរបស់ Lille ពានប្រកាសចូលនិវត្តពីអាជីពបាល់ទាត់នាថ្ងៃទី ១០ មិនា ឆ្នាំ ២០២៣។ ហែលកាត់ពេលវេលាឈរជើងជិត ២ ទសវត្ស Hazard គេបង្ហាញខ្លួនសរុប ៦២៣ ប្រកួត ក៏រកបាន ១៦៧ គ្រាប់ និង Assist ១៥៧ លើក ជាមួយការឈ្នះពានរង្វាន់ធំៗ មិនក្រោម ១០ គ្រឿង រួមបញ្ចូលទាំង Champions League៕
ប្រភព៖ បរទេស